BUKU ENDE NO. 244 SD 307

B.E No. 244 BINSAN RO ASI NI ROHA BL. 22

1. Haburjuhon ma mangalo Hajahatonmi sude
Tagan songgop asi roha Ni Tuhanta i dope
2. Alo, ai gogot do dalan Na hopit bahalna i
Tinggal do di hamagoan Na so lao tu surgo i
3. Alo, asa lam ro ringgas Pasadahon rohami
Tu Tuhan Jesus Kristus Sai tundalhon dosa i.
4. Sai gogoi ma martangiang Tu Tuhnata Jesus i
Unang ho marpansadian Borngin nang arian i.
5. Ia monang ho sahali Manaluhon dosa i
Unang olo ho mansadi Tagam ma donganna i.
6. Ai saleleng tainganhon Hasiangan on dope
Na so holang do jagaon Dosa, roha, daging pe.


B.E. No.245 ASAL MA IBANA BL.61

1. Anggo didongani Tuhan Jesus au
Salelengna mangingani Rura hasusaan au
Sonang do rohangku Ai huboto Jesus do donganku.
2 Molo Tuhan Jesus Donganki tongtong
Bahenonku do maporus Na mangarop tondingkon
Sai martua iba Molo Tuhan Jesus donganniba.
3. Sonang do rohangku Raphon Jesuski
Ai disesa do dosangku Dipabulus langkangki
Asa unang mago Tondingkon bahenon ni pangago


BE. No. 246 JESUS URUPI BL. 116

1. Jesus urupi pamonang ma hami Tatap ma gogo ni na holom i
Na so mansadi mangonggop di hami Naeng polgahanna do hami sude
Sai dipingkiri sibolis dalanna Manang beha au tongtong arsahanna.
2. Jesus pamonang au, Ho do manobus Jala nampuna au on do tongtong
Holan tu Ho nama ahu maporus Mida pangela ni portibi on
Molo sai masirapusan rohangku Unang tadingkon au ale Tuhanku.
3. Jesus pamonang au sai huhilala Dokdok ni dosa sude na hubaen
Sai dipaingot rohangku do sala Angka na sian posongku hubaen
Loas ma i paserephon rohangku Jala paingot ma au di mudarMu
4. Jesus pamonang au jala intopi Api ni hisap ni daging di au
Togang ma au molo naeng manolopi Tahi ni roha na jahat i au
Ho ma, o Jesus manggohi rohangku Asa malua au sian musugku.
5. Jesus pamonang au molo marujung Ariaringku di na rodop on
Ho ma patauhon au, asa diusung Surusuruan au on tu jolom
Jesus, urupi au jala pamonang Asa tongtong di lambungMu au sonang.


B. E No. 247 SAI HEHE MA HAMUNA, HAMU, BL. 159

1. Sai hehe ma hamuna Hamu parangan ni
Tuhanta Jesus Krsitus Tu paraloan i.
Ai ndang tarbaen ho monang Nda na mangalo ho
Ai musu ni Tuhanta Tung ingkon talu do.
2. Tangihon panjouonNa Tu hamusuon i
Ihuthon ma hataNa Mangalo dosa i
Ibana do donganmu Mandopang musu i
I pe tongtong haposi Tuhanta Jesus i.
3. Ndang jadi haposanmu Gogom sandiri, da
Ai tung na so hasea Do i di Debata
Sai naeng basahononNa Di ho sinjatami
Ai ndang tarbaen so talu Musuna baenon ni.
4. Manaon ma ho satongkin Di paraloan i
Tibu do i marujung Dibaen Tuhanta i
Dung i partumpalanna Ma ho di surgo
Donganna ho manggomgom HarajaonNa i.

B.E No. 248 SALELENG HO DI TANO ON BL. 18
1. Saleleng ho di tano on Patigor ma roham
Paingotingot ma tongtong Nidok ni Debatam
2. Sai songon hau na denggan do Ramos parbue ni
Bulungna pe na uli do Antong sai tiru i.
3. Godang do hinauli ni Aek mata i tongtong
Pasuman ma dirim tusi Sai baen roham sintong
4. Bolongkon sian rohami Luhut na so ture
Alai na sian Tuhan i Ramoti ma sude.
5. Sai tiru Tuhan Jesus i Naung ro humophop ho
Pambaenna nang hataNa i Hangoluanmu do.
6. Ibana do padomu ho Tu Tuhan Debata
MudarNa diusehon do Di dolok Golgata.
7. Arga do hita sasude Ditobus Jesus i
Ai naeng mangolu hita be Di adopanNa i.
8. Antong ringgas ma hita be Mangalo dosa i
Tahangoluhon ma sude Na sian Tuhan i.

BE No.249 NGOT MA HO, O TONDINGKI BL. 122
1. Ngot ma ho, o tondingki Dungo martangiang
Asa unang musu i Tole so tinagam
Bisuk ni setan i Do manait tu dosa Lan na bonar roha.
2. Ngot ma ho, modom i Dibagasan dosa
Asa unang ala ni Ho marutang hosa
Ai hatop Nang tahop Ro ma pangunjunan Tu naso mangam
3. Dungo, ai na so tarbaen Tondi ni Jahowa
Manorangi ho, mambaen Sirang sian dosa
Ingkon do dungo ho Asa lehononNa Denggan ni basaNa
4. Dungo, jaga rohami Unang dililuhon
Hisap ni dagingmu i Jala ditaluhon
Ginjang ni Roha i Do jumotjot ala Pangalapan sala
5. Martangiang ho huhut Asa saut malua
Sian jea saluhut Gabe ho martua
Jesus do Na gogo Jala tau mangalo Saluhut pangago
6. Ala ni sai jouhon ma Goar ni Tuhanta
Na binaen ni Debata Parsigantunganta
Meleng do Dompak ho Pinggol ni Jesusmu Mangoloi sangkapmu.
7. Ala ni manongtong ma Hita martangiang
Tu Amanta Debata Di banuaginjang
Lam tibu Ro tutu Tingki binuhulNa Manguhumi jolma

B.E No 250 HATAMI ALE TUHANKU BL. 181
1. Sitostosi nasa ihot Na binaen ni dosa i
Sai asi rohaM sai topot Hami na tinobusMi
Sai paias rohanami Sian dosa sasude
Paima bali sian hami Nasa roha daging pe.
2. I do Jesus ulaonMu Diturpukkon Ama i
Na tongtong naeng radotanMu Paima sun marujung i
Ai ndang jadi mago sada NilehonNa i di Ho
Ingkon sahat do sudena Tu banuaginjang ro
3. Ala ni togihon hami Sahat tu na sun denggan
Sai oloi tangiangnami Lomo ni rohaM hian
Tatap hami na marlea Ala pinarsilangMi
Angka na tongtong porsea Di hataM na sintong i
4. Raja sai rajai ma hami Siparmonang , monang ma
Sai taluhon musunami Togu ma tu Debata
Hami angka na marpadan Dibagasan mudarMi
Jala na burju mardalan Tu banuaginjang i.
5. Raphon Ho naeng mate hami Jala na marlea pe
Bunu ma hian di hami Roha jea i sude
Sai tumpahi hami monang Ro di ajalnami be
Baen mardame jala sonang Tondinami sasude.

B.E No. 251 NA MONANG I DO BL. 138
1. Na monang i do na muse manganhon Parbue ni hau hangoluan i
Ndang jadi idaonna hamagaoan Nang hamatean paduahon i
Ai Debatana Papos rohana Mambaen langkana tongtong tiur,
Mambaen langkana tongtong tiur
2. Na monang i ndang tupa hahuaon Ni hamatean paduahon i
Sai jongjong do ibana maradophon Bohingku di banuaginjang i
Sai idaonna disi Tuhanna Ro di donganna na monang i,
Ro di donganna na monang i.
3. Na monang i do lehononku mangan Di surgo manna na buni dope
Pangalahona do tongtong ingoton Margoar na imbaru do muse
Na sinurathon tu batu intan Tongtong martua panjalo i,
Tongtong martua panjalo i.
4. Na monang i marnida pambaenanku I do na marmahani bangso i
Pasahatonku deba sahalangku Tu tangan ni sude na monang i.
Sai rosahanna muse alona Patunduhonna do musungki,
Patunduhonna do musungki
5. Na monang i do na manjalo ulos Na saksak di banuaginjang i
Goarna i do na so jadi mosos Sian pustaha hangoluan i
Taringotanku di Debatangku Sude donganku na monang i.
Sude donganku na monang i.
6. Na monang i do ingkon gabe tiang Di bagasjoro ni Debatangki
Di bagas i tongtong ibana mian Jumujung goar ni Jahowa i
Uhirhononku tusi goarhu Sijujungonku di surgo i,
Sijujungonku di surgo i
7. Na monang i do hundul raphon Ahu Di habangsangku na di surgo i
Tudoshon Au di lambung ni Amangku Partohap do di hasonangan i
Na maradian di hasonangan Sude na monang na burju i,
Sude na monang na burju i
8. Urupi au, o Jesus asa monang Au maralohon angka musungki
Portibi on sibolis nang pamatang Do na manaiti au tu dosa i
Pasangaponku tongtong goarMu Di ingananku di surgo i,
Di ingananku di surgo i.

B.E No. 252 PAIAN MA DI HAMI BL. 6
1. O Jesus sai dongani Ma hami sasude
Pasada rohanami Asa bulus sude.
2. Ndang hadalanan hami Salangka na ture
Dung Ho pe dongannami Tiur ma sasude
3. Sai Ho ma dongannami Dung i maporus do
Sudena musunami Tunduk dibahen Ho
4. Laos songon dongannami Dongani hami on
Di na tarsosak hami Di hasiangan on.
5. Sai tong dongani hami Naung gabe naposoM
Dongani dongannami Na di portibi on.
6. Dung suda bohalnami Asi ma rohaMi
Pamasuk tondinami tu hasonangan i.
7. Sai pos do rohanami Marningot hataMi
Ho pangondiannami Di paruhuman i.

B.E No: 253 ALE DEBATANGKI BL.209
1. Ale Debatangki Lam jonok rohangki, jonok tu Ho
Ima na sai tongtong, sangkap ni rohangkon, jonok tu Ho
Nang beha panoguM Di au on naposoM
Asa lam jonok do jonok tu Ho, jonok tu Ho.
2. Ale Debatangki Lam jonok rohangki Taiti tu Ho
Bangkol pe dagingkon Losok pe rohangkon Manopot Ho
Tong do malungun au Tu Ho tangihon au
Lam jonok rohangki Taiti tu Ho
3. Ale Debatangki Lam jonok rohangki Taiti gogo
Asa tung sonang au Ala basaM tu au Taiti gogo
Ai songon pulut i Dosa di rohangki
Asa tung lam gogo Taiti tu Ho, Taiti tu Ho.
4. Ale Debatangki, jaga ma tondingki Tangihon au
Molo diloas Ho sipata jea ro Manahop au
Naeng ma nang jea i, Manogu rohangki,
Tu hasonangan i Tangihon au, tangihon au
5. Ale Debatangki Lam jonok rohangki Jonok tu Ho
I do na sai tongtong Disangkap rohangkon Jonok tu Ho
Asa di tingki ni Lomo ni rohaMi
Au ro ru lambungMi Jonok tu Ho, Jonok tu Ho.

B.E No 254 DI NA PONJOT ROHAGKU BL. 124
1. O Jesus Sipangolu Parasiroha i Sai loas au mangolu Palas ma rohangki
Pasihar ma bohingku Pangolu ma tondingku Tangihon hatangki.
2. Sai sesa ma dosangku Huhut padao ma i Paombun ma rimasMu Di au parjahati
Gok dame baen rohangku O Tuhan Debatangku Tangihon hatangki
3. Pabali sian ahu Sude na roa i Na mangingani ahu Mangago tondingki
Ho naeng ihuthononku Ho naeng pasangaponku O Jesus Tuhanki.
4. Patiur ma rohangku Marhite TondiMi Ai naeng do antusanku HataM na denggan i
Naeng haporseaonku Tongtong hasintonganmu Padaohon jea i.
5. Pagorgor di rohangku Ma holong ni roham Ai naeng haholonganku Do Ho ro di hatam
Sai naeng pasauthononku Do lomo ni rohaMu Dibaen denggan basaM.
6. Antong sai pargogoi ma Au on na bojok i Ai ingkon dipatupa Tondim do i sude
Tung aha ma gogongku Lao mangoloi patikMu ? Di au soada be.
7. Dibahen i Tuhanku Asi ma rohaMi Pauba ma rohangku Sai pargogoi ma i.
Tongtong ingani ahu Huhut sai togu ahu Tu dalan na ture.

B.E. No.255 HOLAN SADA DO NA RINGKOT BL.187
1. Holan sada do na ringkot Jesus lehon i di au
Manang aha pe na dapot Ndang tuk pasonangkon au
Nang arta nang sangap sude hamoraon Ndang tau mangalehon di au hasonangan
Alai molo dapot na sasada i Tongtong las rohangku hinorhon ni i
2. Molo naeng di ho tondingku Arta na sasada i
Ndang tarbahen luluanmu Anggo so di ginjang i
Disi, di siamun ni Tuhan Jahowa Do hundul AnakNa na dung gabe jolma
Ibana do jambar na sun denggan i Antong o tondingku jalahi ma i.
3. Suang songon si Maria Tumangihon hataMi
Naeng o Jesus na badia Hundul au di lambungMi
Antong ale Tuhan pasada rohangku Palua ma au sian nasa dosangku
Sai Ho ma o Jesus nampuna au on Sai Ho ma manggohi rohangku tongtong.

B.E. No. 256 JESUS KRISTUS I DO RAJA BL.95
1. Jesus Kristus i do Raja Pinabangkit ni AmaNa
Manggomgomi sasude Manggomgomi sasude
Jala nasa hajolmaon Tu Ibana do mar-Tuhan
Parhatopotonna be Parhatopotonna be
2. Angka surusuruanNa Humaliang habangsaNa
Pasangaphon Raja i, Pasangaphon Raja i
Na di ginjang marhuaso Harajaon na di tano
Mangoloi patikNa i Mangoloi patikNa i
3. Debata do sasadasa Holan Jesus do tudosna
Anak tu Amana i, Anak tu Amana i
Na so meret habangsana So marujung do ngoluna
Tongtong gomgomanNa i Tongtong gomgomanNa i.
4. Holan Jesus patupahon Na malua hajolmaon
Ala ni mudarNa i, Ala ni mudarNa i
Nunga sahat hangoluan Sai tongtong do partuaon
Dibagasan Jesus i, Dibagasan Jesus i
5. Hamu angka na mardosa Nang hamu na ponjot hosa
Ala ni na porsuk i, Ala ni na porsuk i
Sai pasahat rohamna Nang na hinolsohonmuna
Tu Tuhanta Jesus i, Tu Tuhanta Jesus i.
6. O hamuna na badia Nang na tigor i, na ria
Nang sude naung monang i, Nang sude naung monang i
Tole ma hamu natorop Tole ma marolopolop
Puji ma Tuhanta i, Puji ma Tuhanta i.

B.E No. 257 RAJA NA TUMIMBUL BL. 210
1. Jonok Debatanta Unduk be ma hita Lao marsomba tu Tuhanta
Mijur Debatanta Tu tongatonganta Tapahohom ma rohanta
Somba ma Debata Di banuaginjang Na so halompoan.
2. Jonok Debata surusuruanNa Do manungkap di joloNa
HabadiaonNa Dipapujipuji Dohot ende na ummuli
Hita pe sasude Sai girgir rohanta Mangoloi Tuhanta.
3. O ale Jahowa Hutundalhon hami Dosa dohot jeanami
Tondi dohot daging Hupasahat hami Tu tanganmu Tuhanami
Sada do i ma Ho Sioloannami Pasangaponnami.
4. Debata na songkal Jala marmulia Baen ma dohot na badia
Lehon ma gogongku Asa oloanku Ho sobokkon suruanMu
Lomo ni rohami Naeng patupaonku Ho haholonganku.
5. Baen tobok rohangku Sian dosa sirang Sai mardame jala sonang
Sai pabontor ahu Asa idaonku BohiMi muse Tuhnaku
Debata Taiti ma Tu hataM rohangku Ho naeng oloanku.
6. Sai ingani ahu Joro baen tondingku Bagas habadiaonMu
Sai bongoti ahu Baen holong rohangku Di Ho Tuhan Debatangku
So pe au Manang lao Ho ma sai hutatap Jala hupasangap.

B.E No. 258 SAI HUTUJU BL. 218
1. Sai hutuju Hangongolu Na pasabam au
Sai hugogo Lao tu surgo paima sahat au
Sabat hupasiding do Hata on huingot do
Sai datdati Manjalahi Hasonangan i.
2. Naung pinio Do tu surgo Au binahenMi
Molo togang Au mardalan Na jorbut ma i
Anggo na tarsabat i Mago do tumpalna i
Hutadingkon Hutundalhon Na dipudingki.
3. Ale Jesus Sai pabulus Langkangki tu Ho
Pargogoi ma Au na loja Na maheu do
Sai apoi ma rohangkon Manundalhon tano on
Baen malua Baen martua Au pardagang on.
4. Ndang margogo Au mangalo Angka dosangki
Taiti ahu Tu lambungMu Tu na sonang i
Pasingothon hataMi Sai tongtong tu rohangki
Pujionku Ma goarMu Salelengna i.

BE. No. 259 SAI BETA MA TONDINGKU BL. 166
1. Sai beta ma tondingku Tumopot surgo i
Saleleng ho di toru Ndang sonang rohami
Disi partuaonmu Disi do ingananmu
Disi ma sonang ho Ipe tu surgo do.
2. Na mangaliliani Tostosi ma sude
Ai nunga dihophopi Tuhanta hita be.
Ai nunga ditaluhon Do dosa hamatean
Lao paluahon ho Ipe tu surgo do.
3. Di ginjang do Amanta Parhuasian i
Ditatap do tondinta Sai naeng ma sonang i
Dilehon do ulosna Tinonun ni AnakNa
HatigoranNa i Sai topot surgo i.
4. Malungun do rohangku O Jesuski di Ho
Marhabonghabong ahu Nian tumopot Ho
Mardomu dohot dongan Tumpak marhasonangan
Mamuji goarMi Tongtong di surgo i.
5. Tu Ho do huparguru Na hupangido i
Ho ma haholonganku HataM oloanki
Sai Ho ma tataponku Paimahon pandokkonMu
“Bongoti surgo i Tu hasoaganMi.”

B.E. No.260 HOLAN JESUS DO HUBAEN BL.40
1. Holan Jesus do hubaen donganku Ai Ibana pasonangkon au
Ingkon sai tongtong tiur langkangku Molo raphon Jesus i au lao
Molo raphon Jesus i au lao.
2. Tano dohot laut sonang hubolus Molo sai diiring Jesus au
Tu banuaginjang pe sai torus Do boanon ni Tuhanku au.
Do boanon ni Tuhanku au.
3. Di na modom manang di na hehe Jesus do donganku sai tongtong
SoaraNa do tongtong hubege Mangapuli au na dangol on,
Mangapuli au na dangol on.
4. Jesus do tongtong haporusanku Arta dohot hangoluanki
Nang tondingku nang pe pamatangku Hupasahat tu tanganNa i
Hupasahat tu tanganNa i.
5. Di na ro panjouna di tondingku Las rohangku mangihuthon i
Ndang tagamon susa be rohangku Raphon Tuhanki di surgo i ,
Raphon Tuhanki di surgo i.

B.E No. 261 BINTANG SIPARTOGI BL. 145
1. Bintang sipartogi Batu mamak i
Tungkot sitiopan Di na landit i
Roti hangoluan Mual na uli
Pandang situjuon I ma Jesus i, Pandang situjuon I ma Jesus i
2. Ho tutu gogongku Hatiuron i
Dame ni rohangku Hasonanganki
Ngolu ni tondingku Sihaposanki
I ma ale Tuhan Ho sambing do i, I ma ale Tuhan Ho sambing do i
3. So marhitehite Ho, o Jesuski
Ba tung sian ise Gogo lao tusi ?
Ho tarbaen paneang Siporsanonki
Holong na hinirim Ho do Jesuski, Holong na hinirim Ho do Jesuski

B.E. No.262 JAHOWA TUHANKI BL.149
1. Jahowa Tuhanki Ho mual ni na denggan
Sitompa sasude Silehon hangoluan
Sai lehon ma di au Pamatang na hipas
Maringan ma di au Baen roha na ias.
2. Urupi au mandok Na patut dohononku
Asa ture hudok Na roa oromonku
Tung baen ma au gomos Mandok na patut i
Margogo ma antong Baen dohot hatangki.
3. Di na tarsosak au Padao ma pandelean
Sitaonon na di au Urupi au mamorsan
Pamonang au tongtong Palambok rohangki
Parroha na holong baen angka donganki.
4. Padame au Tuhan Pasaor tu angka dongan
Ai i do na hombar Tu hataMi o Tuhan
Molo mararta au Binaen ni asiMi
Sai unang be di au Na geduk saor tusi.
5. Ramoti au tongtong Saleleng au mangolu
Matua pe au on Pabenget ma rohangku
So tung marlindang maon tongtong parangengki
Ubanon pe au on Naeng hot do sangaphi.
6. Di hasusuda ni Bohalhu o Tuhanku
Paingot au disi Di nasa na tinaonMu
Tu hasonangan i Pasahat tondingki
Nang di tanomanki Ramoti orbukki
7. Di hamumulakMi Di ari haheheon
Sungguli au disi Baen au marhasangapon
Padomu au disi Tu dongan sasude
Naung pinaluaMi Sian dosana be.
8. Antong pinuji Ho, O Debata Amangku
Pinuji dohot Ho, O Jesuski, Tuhanku
O Tondi nang di Ho Ma hasangapon i
Sitolusada i Sai jalo endengki.

B.E No. 263 TUDOS TU GALUMBANG I BL. 165
1. Tu dos tu galumbang i tagan habahaba
Tahi ni parjahat i mangulahon dosa
Haporusan sada do Pangondian sada do
Kristus Tuhan Na paluahon au.
2. Sego dohot sasude Bintang dohot bulan
Sego tano on muse Ise haporusan ?
Ndang adong tinanda be Dungkon Tuhan Jesus i.
Kristus Tuhan Na paluahon au.
3. Di na laho mate au Sai asi rohaMu
Unang loas lonong au Tu banoatoru
Sai surdukhon tanganMi Dompak au tinobusMi
Kristus Tuhan Na paluahon au.
4. Salpu hamamatengki Ro ma hangoluan
Pujionku ma disi BurjuMi o Tuhan
Salelenglelengna i Ho nama pujionki
Krisus Tuhan Ho sipalua au.

B.E No. 264 ADONG DOPE PARADIANAN BL. 217
1. Sai togu au tu hasonangan O Jesus hangoluanki
Sian sude na dung rarangan Paholang ma pingkiranki
Aha labana hangoluan Na so dilehon Ho, o Tuhan Marhitehite mudarMi ?
Sai tong paunduk ma rohangku Unang adong be hagiothu Na so hombar tu rohami.
2. Ale Rajangku unang loas Lam ganggang sian Ho be au
Patogu ma sai tong pahoras Di pardonganonMi ma au
Na so adong be hatuaon Di balik ni na jinalahan Ni holong ni roham di au
Huboto ala ni hatamu Lam hot ditiop i rohangku Sai hasonanganki do Ho.
3. Ingkon tongtong burju rohangku Saleleng na mangolu au
Ai Ho sambing haholonganku Tu Ho ma marhaposan au
Sai tong jagahon ma rohangku Pingkiranki, pambahenanku Ai tutu anakMu do au
Pasobok ma rohangku dohot RohaMu asa sanga sogot Sobokkon Ho tarida au.
4. Ai nunga tung barani ahu Manaon parsahitan i
Na olo ahu ganup ari Mangihut Jesus, Tuhanki Hosom ni jolma pe hutahan
Hohom do au tung nileaan Hutiru Tuhan Jesus i Ai dung di ujung ni langkangku
Disi tongtong halashononku Sudena na di Tuhanki.

B.E No. 265 NAUNG MORU DO MUSE SATAON BL. 192
1. Mauliate ale Tuan Ala ni hahoholongMi
Ro Ho sian banuaginjang Pangolu au na mago i.
Hudok di Ho mauliate Naung singkop hangoluanki
Ala holong huhut marasi RohaM di au pardosa i.
2. Tu Ho hulehon ma tondingku Sai baen ma i ingananMi
Sai suru ma TondiM tu ahu Manogunogu rohangki
Najolo holong ni roham do Manaiti Ho tu tano on
Laos i mandasdas Ho nuaning Pangolu au na dangol on.
3. Urati ma huhut tutungi Sude na jat di rohangki
Marhite rante manang tali Tarihot au di dosa i
Ndang dia imbar nii, o Tuhan Boi do malua au disi
Hasian i rohaM ma ahu Pardosa na malua i.

B.E No. 266 TU BANUAGINJANG DO BL. 151
1. Tu banuaginjang do Pardalanta i
Na dihalungunhon ho Tulus ma disi
Anggo dison Mubauba do sude So sadia na ture Di tano on.
2. Tu banuaginjang i Sai tabereng be
Molo ngot manogot i Nang bodari pe
Olo, tongtong Martangiang ho gogo Ia naeng maruli ho Di Jesus i.
3. Tu banuaginjang i Bereng ma tongtong
Molo na hurangan ho Di portibi on
Ndang jadi be Ganggu rohami disi Debata patupa i Singkop sude.
4. Tu banuaginjang i Lao do sasude
Dongan na porsea i Di Tuhanta i
Dohot ma ho Alo sipagago i Taon nama hansitna i Satongkin i.
5. Tu banuaginjang i Lao Tuhanta i
Sian haleaon i Na tinaonNa i
Ihuthon ma Sian hatoruon i Dalan na tu surgo i Tu Debata.
6. Tu banuaginjang i Lao ma ho muse
Gari hamatean i ParhiteanMi
Diida ho Ujung ni dalanta i Bagas ni Amanta i Di surgo do.
7. Tu banuaginjang i Hasonangan i
Rap marende ma disi Na porsea i
Haleluya I do diolophon be Di Parmonang Jesus i, Haleluya.

B.E No. 267 O TUHAN SULINGKIT BL. 100
1. O Tuhan sulingkit ma au Sondangi rohangku tangkas.
Gogongku soada di au
Tu Ho paringgas Tu Ho au padonok Di Ho nama au
Tu Ho paringgas Tu Ho au padonok Di Ho nama au
2. Tu aha marguna be i Nang godang sinamot di au ?
Di ginjang di sambulongki
Ho Jesus artangku Tusi do siholhu Sonang rohangki.
Ho Jesus artangku Tusi do siholhu Sonang rohangki.
3. Sude hupasahat tu Ho Ai Ho nampunasa hian.
Tongtong au marguru tu Ho
Ai Ho ale Jesus Sihophop sudena Nampuna au on
Ai Ho ale Jesus Sihophop sudena Nampuna au on
4. Hutiop tanganmu tongtong Dalanku tiur nang sonang.
Sabam ma tongtong rohangkon Ai Ho Sipargogo
Ai Ho Sipargogo Ai Ho Siparngolu Pangolu ma au
Ai Ho Sipargogo Ai Ho Siparngolu Pangolu ma au
5. Dipuji rohangku do Ho O Jesus, donganku tutu
Gogongku sambing nama Ho
Pinuji GoarMu, Pinuji GoarMu, Hupuji burju
Pinuji GoarMu, Pinuji GoarMu, Hupuji burju
6. Tu Ho, o Tuhanku au lao Dung suda bohalhu dison.
Pargogo, parbasa do Ho
Ramoti, dongani. Urupi ma hami Sai togu au on
Ramoti, dongani. Urupi ma hami Sai togu au on

B.E. No: 268 DEBATANGKU DO DONGANKU BL. 127
1. Debatangku do doganku Ganup ari ganup taon
TumpahanNa do langkangku urupanNa au manaon
Pos do rohangki disi Debata do donganki Salelenglelengna i.
2. Debatangku do donganku Nang pe marsitaonon au
Ai Ibana do Amangku Anak haholongan au
Pos do rohangki disi Debata do donganki Salelenglelengna i.
3. Debatangku do donganku Tung na ganggu m’au disi?
Nda tongtong hangoluanku Asi ni rohaNa i ?
Pos do rohangki disi Debata do donganki Salelenglelengna i.
4. Debatangku do donganku Na manogu au tongtong
TioponNa do tanganku Nang lao suda bohalhon
Pos do rohangki disi Debata do donganki Salelenglelengna i.

B.E No. 269 TU JOLO NI TUHANKU BL. 163
1. Mardalan au saonari Tu hasonangan i
Jumonok ganup ari Lam jumpang tingki i
Sian na dao huida Hatiuronna i
Sai sonang do nasida Naung tolhas ro disi
2. Godang do halilian Di tongan dalan i
Hatop do au mardalan Tu hasonangan i
Godang do hasusaan Na humaliang au
Hubolus parmaraan Marningot Jesus au.
3. Didadang lasni ari Ditinggang udan au
Jotjot huhabiari Na mgnggopgopi au
Matangku sai manatap Tu sitioponki
Adian do husangkap Rade di surgo i.
4. Las situtu rohangku Nang lantap alongki
Sai Jesus do donganku Ai i haposanki
Ibana na manogu Arian borngin pe
Pos situtu rohangku Sai sahat au muse.
5. Hugolom di rohangku Hau pinarsilang i
Laos i do haposanku Parsigantunganki
Ai nunga saut ditobus Tuhanku tondingki
Ibana do patulus Pasahat langkangki.
6. Pos situtu rohangku Manulus dalan i
Tung suda pe bohalhu Sai sahat au tusi
Tung loja ganup ari Di pardagangan on
Alai satongkin nari Sai sonang au tongtong

B.E No. 270 NGOT AI TORANG DO ARI BL. 152
1. Ngot ai torang do ari Salpu do borngin i
Lam salpu ganup ari Pardalananmi
Ringkoti sumarihon Na pangoluhon ho
Ai di na ro na holom Maradian ho.
2. Ngot ai torang do ari Longkang baen dosa i
Haporseai ma hata Sian Tuhan i
Sesa dosam sudena Dibahen Jesus i
Sahat ho bahenonNa Tu na sonang i
3. Tole, sai saut ma hehe Nang hita on sude
Tataon ma reherehe Nang na porsuk pe
Tung sasude gogonta Tapangke ma, ale
Pareak sambulonta Na di surgo i.

B.E No. 271 BETA, BETA HITA BL. 242
1. Beta, beta hita Lao tu surgo i Ai disi Amanta Sipasonang i
Ndang be na di tano Sihirimon i Nasa na lao sego Ndang haposan i
Ala nii sai tole unang ganggu be Tatap ma jambarmu Naung leleng rade
2. Beta ma ihuthon Tuhan Jesus i Na tau pangoluhon hita jolma i
Holong do rohana di pardosa i Ai disesa sala ni na unduk i
Ala nii sai tole unang tading be Naeng ma sahat hita Saluhut muse.
3. Beta, beta hita lam jumonok ma Ujung ni langkanta ipe beta ma
Ndang be masa sogot Holan las ni roha sonang sasude
Alanii sai tole ringkot ma roham Ingot ma jambarmu Na di ginjang an.

B.E. No. 272 SAI TOLE ,TOLE RO SUDE BL.249
1. Sai tole,tole ro sude Ihuthon Jesus i
Marhohos hasintongan be Di paraloan i
Mandera silang i Partogi Tuhan i
Sarune pe mangkuling do Sai tole,tole ro.
2. Pangansi do musunta i Sai songon na burju
Hape gok sipaoto i Sitolon na tutu
Diela hita be Mambaen na so ture
Mangago daging tondi pe Dungo tajaga be.
3. Solukkon hatigoranmi Baen partahananmi
Nang pe haporseaon i Baen lombulombu i
Nang patta sai ringgas Rohanta pe hiras
Mamaritahon dame i Baen halolomo i
4. Antong sai paralohon ma Haporseaonmi
Dipargogoi Debata ma Sipartangiang i
Tajom podangta i, I ma hataNa i
Maruli tumpal do sude Na so sumurut be

B.E. No.273 JESUS TUHANKU RAJAI MA AU BL.240a
1. Jesus Tuhanku rajai ma au on Asa mangihut tu Ho au tongtong
Topot rohangku ingani ma i Unang be masuk na asing tusi
Jesus pasonang rohangku tongtong Asa marguru tu Ho au tongtong
2. Tung na godang do pardangolanki Tagan so Jesus dope tohaphi
Lan hasusaan tongtong ro tu au Tong do sai asi rohana di au
Sai tong disesa dosangku sude Hangoluanku Ibana muse.
3. Nang pe mangonggop sibolis di au Jala magigi musungku di au
Ndada mabiar au pos rohangki Pangodinganku sai Jesus do i
Asal diida Immanuel i Ingkon sumurut sude musu i.
4. Na marhaposan tu Jesus tahe Sai na martua ibana muse
Na marsigantung tu Jesus tutu Jala marroha na bonar burju
Sonang ibana di portbi on Sonang nang sogot di surgo tongon.

B.E. No. 274 SAI HEHE MA HAMUNA, HAMU BL. 159
1. Ndang jadi ho mardalan Sasada ho antong
Tuhanta Sipangolu Baen donganmi tongtong
Tartondong ho ma surgo Di hadosaonmi ?
Sai tangkup Tuhan Jesus Siporsan dosami.
2. Ndang jadi ho holsoan Dibaen na porsuk i
Tu Tuhan i aluhon Na niarsakkonmi
Ibana Sipartogi sitiop tanganmi
Ture panogihonNa Di na porsea i.
3. Ndang jadi ho mamereng Tu pudimi ale
Mardame ma rohamu Marhite Jesusmi
Laos Jesus Sipatupa Paradianan i
Di lambung ni AmaNa Dibaen holongNa i.
4. Ndang jadi ho gangguan Di hamamatemi
Nang laos pasombuonNa Na hinophopNa i
Asal hian donganmu Tuhanta Jesus i
Sai saut pamonangonNa Ho di ujungna i.

B.E No. 275 O JESUS TUHANKI BL. 245
1. O Jesus Tuhanki Ho Siparmonang i Raja tongtong
Ndang na margogo au Molo so Ho di au
I pe dongani au Di tano on.
2. Sai ro do setan i Manaiti rohangki Dao sian Ho
Ipe ingani au Ai molo Ho di au
Ingkon manigor lao Musu naung ro
3. Molo burju au on Maniop Ho tongtong Sitobus au
Talu do musu i Ndang be agoon nii
Au na tinobusMi Monang ma au
4. Ndang hahuaon ni Dosa be tondingki Malua au
Ho huihuthon do Surgo hutuju do
Tongtong jambarhu Ho Sonang ma au.

B.E. No. No.276 TUMPALHU NA UMMULI HO BL. 235
1. O Jesus Siparmonang i Na manaluhon sasude
Na tau mangago hami Naeng Ho tongtong ditano on. Parsigantungannami
2. Dongani hami sasude Asa tung monang hami be
Di paraloannami Ai na gale do sasude Sai pargogoi ma hami
3. Pamonang hami on sude Nang angka dongannami pe
Tambai ma na porsea Asi rohaM di huriaM Padao ma nasa jea.
4. Antong,sai tatap ma bangsoM Saleleng di portibi on
Sai lehon hatongtongan Taruli be ma sasude Di tumpal hangoluan.

BE. No. 277 LAS SITUTU ROHANGKU BL. 153
1. Marsada roha hita Sitanda Jesus i
Tatiop tong jamita Pasonang roha i.
Sai pir tondinta be,sada tongtong rohanta
Mangihut tu Tuhanta Sihophop sasude.
2. Portibi on na rundut Ndang tiruonta be
Arina i lam sundut Jonok ujugna i
Rohanta sasude Sai tu banuaginjang
Gomos ma hita tindang Managam Tuhan i.
3. Manongtong ma rohanta Mangalo bangko i
Patigor be dalanta pahombar Hata i
Hisap ni roha i Ndang be ihuhononta
Tuhanta do gogonta Lao manundalhon i.
4. Suman tu paisolat Harohaonta be
Lam leleng, lam marbolat Do sian sasude
Na so di Tuhan i Ibana do artanta
HataNa sinjatanta Dompak na holom i.
5. Burju ma tasarihon Manjangkon Tuhan i
Ibana tatangihon Lam leleng, lam ture
Gomos taingot be Jonok do haroroNa
Lao pasonggophon bona Ni hatuaon i.
6. Sai jumpang pardonganon Binaen ni Hata i
Sude na marsitaonon Tahaholongi be
I do niula ni Tondina na badia
Di tonga ni huria Sinondanganna i.
7. O Jesus Tuhannami Pardagang na hinan
Sai Ho manatap hami PaisolatMi hian
Torusi ma tongon Sudena rohanami
Sai Ho hutagam hami Di pardagangan on.

B.E No. 278 BANGSO NA SUMURUNG I BL. 234
1. Bangso na sumurung i Na hinophop ni Tuhanta Debatanta
Naung pardame na sintong Na tongtong
Holan angka i huria ni Tuhanta na badia Na manghophop hita on.
2. Ndang sae naung tardidi ho Naeng marunduk
Tu Tuhanmu pingkiranmu Ai parroha na haru so haru
Ndang goaron be huria ni Tuhanta na badia Sioloan situtu.
3. Nunga masuk ho tusi Mangihuthon Tuhan Jesus ?
Nunga tulus Dipasahat ho burju situtu
Rohami tu hasintongan gabe dohot ho golongan Ni bangsona na burju.
4. Parsidohot ho tutu Lao mangalo isaramu nang dosamu?
Naung rapet tu Tuhanmi rohami?
I do tanda ni bangsona dipasiding do sogona Diihuthon Tuhan i.
5. Bangso ni Tuhanta i Marsihohot do i jongjong ndang malonglong
Sai marhamonangan i di sude
Gari ro pe hamatean holan dalan i manean Ipe masuk ho tusi.

B.E. No. No.279. PASAHAT MA SUDENA BL.160
1. Pasahat ma sudena Na hinolsohonmi
Tu Debata Jahowa Pardenggan basa i
Ai guru di Ibana Do tano dohot laut
Lan pe di tahi jolma Roha na do na saut.
2. Tung ingkon haposanmu Jahowa Debatam
Disi ma dapotonmu Sinangkap ni roham
Ai ndang adong gunana Nang pe holsoan ho
Tangiang do dalanna Asa taruli ho.
3. Diboto Debatanta Parasi roha i
Na denggan nang na roa Di hita sasude
Na denggan di patongon Tu hita sai tongtong
Na roa dipadaohon Manjaga hita on.
4. Ipe sai tong haposi Ma Debatanta i
Sian rohaM tostosi Ma pandelean i
Ai dung dihabengethon Ho na hinolsomi
Tibu ma ro langkan Mambuat arsakmi.
5. Pasombu ma Ibana Pature langkami
Na pistar do rohaNa Patupa sasude
Tung sungkot pingkiranNa Lao paluahon ho ?
Sai naeng patarhononNa GogoNa i tu ho
6. Antong, o Tuhannami Pujung ma sude
Na mangarsahi hami Saluhut jea pe
Sai sahat tu tanganMu Ma hami on sude
Tu surgo toguonMu Ma tondinami be.

B.E No 280 TONGTONG TUTU NA DENGGAN DO BL. 173
1. Tongtong tutu na denggan do Pambaen ni Debatanta
Matua so solsolan do Sude do i marhata
Pos ma roham Di Debatam Ihuthon ma Ibana Na bonar do rohaNa.
2. Ndang dung mangansi hata ni Mangaliluhon iba
Ndang dung geduk pambaenna i Lao maminsangi iba
Sai na ture Do i sude Sude do i marala Ndang dung Ibana sala.
3. Diboto Debatanta i Na denggan i di hita
Na so tagamon baenon ni Na so ture dihita
Dibahen i Di rohangki Denggan do unduk hita Di hata ni Tuhanta.
4. Denggan pambaen ni Tuhanki Tiur dibaen langkangku
Tongon do hangoluanki Ditongos Debatangku
Patar ma i Di tingki ni Hapapatarna sogot Dung au tu surgo bongot
5. O Jesus tatap hami on RohaM nama di hami
Di Ho ma tondinami on Dihophop Ho do hami
Tongtong burju Huhut tutu Ho hangoluannami Sai Ho do Rajanami.

B.E. No. No.281 MARTUA DO NA MARHAPOSAN BL.108
1. Martua do na marhaposan Tu Debata Amanta i
Ai i do dapot pangapulan Di nasa parsorion i
Ndang rihit haojahan ni Na mangkaposi Tuhan i.
2. Ianggo sai holsoan hita Tu aha ma marguna i?
Nang pe tongtong dokdok rohanta Pasarisari jea i
Tung i ma paoruhon i ? Baliksa ganda do disi.
3. Dibahen i paso ma jolo Huhut pasabam rohami
Paidaida manang olo Ho unduk di Debatami
Ibana na mamillit ho Na ringkot i diboto do.
4. Diboto do halehetanNa Mambaen las ni rohanta i
Asal diida haposanNa Do hita ndang mangansi be
Ditongos do na denggan i, Andorang so tinagam i.
5. Sai unang dok di haporsuhon Ho ditadingkon Debata
Alai na so manaon sitaonon I do diabing Debata
Manang sintong pingkiranmi Ujungna patandahon i.
6 Mura do anggo di Tuhanta Sobok do di gogoNa i
Na mora i papogosonNa Mambaen sangap na pogos i.
Longang ma sogot rohami Mananda pambaenanNa i.
7. Ipe haporseai Ibana Burju ma ula tohapmi
Ihuthon ma tongtong hataNa Haposi panumpakNa i
Na mangkaposi Tuhan i Na so hea tartading i.

B.E No.282 TUNG BEASA AU HOLOSAN BL. 80
1. Tung beasa au holsoan ? Kristus i Turpukki Na so harampasan
Ise do na tuk mangkinsu Surgo i Di au i Dung tusi ditogu.
2. Marsaemara do au tubu So adong Di au on Otik ugasanku
Songon i tadingkononku Ngolungkon Tano on Di na tos hosangku.
3. Tondi dohot pamatangku Debata Do mala Nang sude artangku
Naeng muse i buatonNa, Huoloi, Hutohoi Nasa pambaenanNa.
4. Molo tung dipaporsanhon Na hansit, na bernit, Ndang huhadelehon
Ai Ibana mangkusorhon Soro ni Aringki Dung na tuk dihorhon.
5. Lan do ari las ni roha Binaen ni Tuhanki Di au naposoNa
Ipe ndang upirhononku Silang i Molo i, Ingkon porsanonku.
6. Setan manang musu jolma Dihangki Ma disi Nang au insahanna
Di nasida ma rohana Tuhanki Jambarhi Do paurakkonsa.
7. Na so tupa do tahutan Roha ni Kristen i, Nang marhabiaran
Nang maradu tos hosana Baenon i Musu i, Ingkopi pir tondina.
8. Ndang tarbunu hamatean Hita on Na tongtong Marpahorseaon
I do ujung ni na bernit Na tataon Nasailaon Lapang lao tu langit.
9. Sahat ma disi jambarhu Na denggan Na torang Do hasonanganku
Ndang adong di tano arta Na tongtong Olo gong Mago do luhutna.
10. Doshon na sanggolom rihit Arta di Tano i Sipatubu sahit
Holan di banuaginjang Do ture sasude Arta na dumenggan.
11. Jesus mual hangoluan Di au, Ho Au di Ho Ndang tarbaen be sirang
Au di Ho, ai tinobusMu do au on Asa tong Ho pasangaponku.
12. Ho di au, ai sai digolom Rohangkn Ho tongtong Di haporseaon
Sai pamasuk au tu ginjang Ingkon ro Au tu Ho Masipaidaan.

B.E No. 283 NANG SIPATA PE IDAON BL. 30
1. Nang sipata pe idaon Debatanta manadingkon
Anak haholongan i Tung na so tutu do i.
2. Nang sipata dipabenda Debata pangurupiNa
Anggo jumpang tingki ni Pintor tongosonNa i.
3. Songon ama di anakna Pangalehon ni Tuhanta
Holan na hasea i, I do lehononNa i.
4. Pos rohangku di Amangku Nang beha hagogotanku
Sai holong rohaNa i Di au on anakNa i.
5. Setan manang musu jolma Nang beha pangarsahina
Mengkel do au mida i, Ai mangolu Amangki.
6. Manang ro pe hamatean Ndada olo au tahutan
Hutiopi Jesus i, I do alealengki
7. Asal ma tongtong jambarhu Asi ni rohaM Tuhanku
Nang pe tu udean au Sae do molo Ho di au.

B.E No. 284 SONANG DO ROHANGKU BL. 204
1. Sonang do rohangku Mida Debatangku Sipangolu i
Sai huhadengganhon Nasa na nilehon Ni Debatangki
Asal lao tu surgo au Jala Jesus di lambungku Sabam ma rohangku.
2. Lohot do tondingku Di Ho Debatanagku Naeng tongtong di Ho
Sai huhagigihon Na tau manirangkon Ahu sian Ho.
Arta ni portibi i Lan do halak dilohoti i ndang huringkoti.
3. Sada holan sada Do hasundunganna. Ninna tondingki. I ma Jesus, Tuhan.
Na tongtong haposan I ma jambarhi Holan i do sangaphi
Di Ibana ma rohangku Nang sude artangku.
4. Timbang ma basaNa Asi ni rohaNa Hangoluanmi.
I ma haposanmu Asa tandaonmu Hasonangan ni
Tondi ni na hohom i Maradophon Debata Na nioloanna.
5. Sahat tu Tuhanku Hansit ni rohangku Sai tongtong hubaen
Ai pangkirimanku Do hangogoonku Uju au mangae
Benget ni rohana i Do niingot ni rohangku Asa lao arsakku.
6. Nasa na maporus Tu Tuhanta Jesus Do marnida on
Moru sitaononna Do dibaen Tuhanta Lam manaek tongtong
Denggan ni turpukna i Asal ma benget rohana Paima ro tingkina.

B.E No. 285 BINSAN RO ASI NI ROHA BL. 22
1. Sai ditongos Debatamu Na hasea i di ho
Nang beha parsorionmu Asal di Jesusmu ho.
2. Na holsoan ala modom Jesus di rohana i
Magopo do morongorong Ai muse maila i.
3. Sai tongtong marroha ama Debatanta i, ale
Sai tongtong di dihilala Arsak ni roham sude.
4. Sai porsea na dumenggan Dipatongon Debatam
Ndang tongtong ho marsitaonon Asal ma hohom roham.
5. Ia naeng diadiaon Rohami pabenget ma
Ai sude do sinarihon Ni Tuhanta Debata
6. Hagogoon ni Tuhanta Ndang marparbolatan i
Ndada pola jut rohana Sungkot pingkiranna i.
7. Di na jumpang i arina Ro pangurupina i
Ai tompu do harorona Pailahon holsomi.
8. Sai martua do sudena Na marhabengeton i
Asal ma burju rohanta Ndang maol patupahon i
9. Marhaposan tu goarMu Jesus, olo au hohom
Sai patulus ma sangkapMu Manang dia pe lomoM.

B.E No. 286 UNANG MA TANGISHON BL. 144
1. Unang ma ma tangishon Holso ni roham
Tu Jesus aluhon arsak ni roham
Molo humaliang Gaor pe sasude
Sai porsea, sonang Do luhut muse
2. Jesus do umboto Holso ni roham
Tatap ma Ibana Bulus ma langkam
Nang pe di na rodop Nang tu surgo i
Sai marolopolop Ho na sonang i.
3. Sai adong do deba Marsak songon ho
Ho ma paboahon Na mangapul ho
Rap ho martangiang Dohot angka i
Paima dipasonang Jesus sasude

B.E No. 287 GAOR DO SUDE HUMALIANG BL. 29
1. Gaor pe sude humaliang Sai na demak do muse
Molo didok Jesus sonang Aha na humotok be.
2. Iluilum do dibilang Molo na marsak roham
Ndang loasonna tarhilang Ho sai papos ma roham.
3. Sai ditangihon Ibana Na martangiang sude
Jala ditatap mataNa NatinobusNa sude.
4. Ipe haposi Ibana Na paturehon langkam
Sai haholongi Ibana Na pasonangkon roham.

B.E No. 288 NA MARGURU DO LUHUTNA BL. 96
1. Na marguru do luhutna Di Jahowa Debatanta
Dohot panumpakNa i Nasa na marposni roha
Na mangkirim di Jahowa I do na martua. i
2. Na marmudu nasailaon Au umbaen marhatuaon
Debatangku i tongtong Na ture manogu ahu.
Mian do tongtong di ahu Dohot tu joloan on
3. Lan do dipasari jolma Na so tau hasonanganna
Jala na so hot muse Anggo sangkap ni rohangku
Debata naeng haposanku Na manompa sasude.
4. Pangkirimon do pasonang Roha ni na marhaposan
Tu Jahowa Debata Ai tu asi ni rohaNa
Hupasahat do sudena Sai dibaen do na tama.
5. Debata do na umboto Na ture di au na oto
Na martingki do sude Tung Ibana ajaranku ?
Tagamon undukkononku Nasa sibaenonNa pe.
6. Tingki ni ariaringku Guru do di Debatangku
Sai rohaNa ma na saut Asal sahat au tu surgo
Lao tusi do au manggogo Songon batang aek tu laut.

B.E. No. No.289 POS MA HO ROHANGKU BL.220
1. Pos ma ho rohangku Di Debata
Bonom ma arsakmu Tu rohaNa da
Unang lomos Tiop ma gomos
Haporseaonmu unang ho bobos
PaluaonNa Ho ma antong Sian nasa jea di tano on.
2. Pos ma ho rohangku Di Debata
Bonom ma arsakmu Tu rohaNa da
Lao mago pe Na dison sude
Sonang bahenonNa Sogo ho muse
Ale Jahowa Haposanki Sai togihon ahu Tu surgo i.

B.E No. 290 AI BEASA TUNG HUMOLSO BL. 25
1. Ai beasa tung humolso jala sai tahutan ho ?
Hasabamhon parsorion Pinarona i tu ho.
2. Sai pangido angka arta Na so olo buruk be.
Sai tundalhon ma na roa Tu na sonang ho muse.
3. Haringkothon manggotaphon Harohaon tano on
Sambulom ma halungunhon Tagan ho di ngolumon.
4. Marisuang ho pasuang Rohami tu Debata
Sai gogoi ma mangkaposi Jesus Kristus Tuhanta.
5. Guru roha ni Debata Ma baen langkalangkami
Amen, amen sai pasangap Ma tongtong goarNa i.

BE.No 291 BINSAR MA, BINSAR MA BL. 41
1. Binsar ma, binsar ma marsinondang ma
Hatiuron sian ginjang Pangoluhon humaliang
Hami sasude, Hami sasude
2. Ngalut ni ngolungki sitaononki
Parsahitan halojaon Jambarmi o hajolmaon
Di portibi on, Di portibi on
3. Tuhanki tua ni hajolmaon i
Ho partanobatoanku Ho tongtong pangkirimanku
Jesus goarMi pos ni rohangki
4 Bereng i jambarmi salelengna i
Unang lohot ho di toru Unang jambarmi lam moru
Tuju ngolumi na di ginjang i.

B.E. No.292 GIRGIR MA HAMU BL.141
1. Dung ro Jesus i patar ma tu au gogoNa sude holongNa di au
Ibana haposan haporusan i Tung mate pe iba sonang roha i
2. Dung ro Jesus i martua sude Na pos roha i sonang do sude
So olo be lonong na mian disi Sude do mangolu ditogu tusi
3. Na bernit pe ro manosak tu au Ilungku pe ro tung marsak do au
Ndang ganggu rohangku ai Jesus di au Ibana gogongku malua do au
4. Patar arsakki peak di joloM Tu ginjang ma au mangido gogoM
Ndang tuk ndang tau jolma haporusan i Sai holan arsakku dipajojor i
5. O Jesus tu Ho marsomba au on Sude ma di Ho hulehon au on
So olo be sirang naung domu tu Ho martua nang sonang na ro i tu Ho

B.E No. 293 NDANG JUMPANG HIAN BL. 142
1. Habot pe roham Porsuk jambarmi
Adong do pangapul Tuhanta do i
Ibana donganmu Mamorsan gogo
Sai unang ho ganggu Sai monang ma ho.
2. Saleleng dison Dokdok do roham
Hansit pamatangmu Marilu matam
Sai bereng tu ginjang Ai Jesus naeng ro
Sai taon ma satongkin Mangolu ma ho.
3. Dung sahat tondim Tu Tuhanta i
Tarapul rohamu Di lambungna i
Mansohot arsakmu Sai sonang ma ho
Sai unang ho ganggu Martua ma ho.
BE No. 294 Unang sai holsoan ho
1 Unang sai holsoan ho, Debata mangolu do
Dirajai do sasudena , arsak mi naeng buatonna ;
Asal ma porsea ho, holsomi maporus do
2. Sai haposi Debatam, jala alo ma dosam
Unang habiari talu, hamonangan do tohapmu
Dipasaut Debatami na pinarbagaNai
3. Molo ro arian I, sai maporus borngin I
Songon I do lao arsakmu mida sondang ni Tuhanmu
Asal sai mangkirim ho , ndang tagamon marsak ho
4. Nang tung ganda dokdok ni sude sitaonon I
unang ho olo ho gangguan , sai benget ma ho mamorsan
tiop holong ni roham manghaposi Debatam

B.E No. 295 HOLAN DI SURGO I BL. 23
1. Holan di surgo i sonang sude, Holan di surgo i sonang sude
Ndang na hurangan be Di manang aha pe Molo huingot i naeng au tusi.
2. Holan di surgo i sonang sude Holan di surgo i sonang sude
Ndang adong dosa be Uhum sude ture Sai na martua be disi sude.
3. Anggo di tano on susa tongtong, Anggo di tano on susa tongtong
Jahat ni jolma do Sai na lam ganda do Dung i ujungna be mate sude.
4. Anggo di tano on hurang sude Alai di ginjang an sai sonang be
Haporseaon i Dalan tu surgo i Holong ni roha pe Hot do muse.

B.E No. 296 HOLSO ROHANGKU DITATAP HO BL. 231
1. Holso rohangku ditatap Ho Tahutan ahu pangapul Ho
Naung tu tanganMu do sahat au Jesus Tuhanku ramoti au.
2. Pos do rohangku di Ho antong Huhaholongi do Ho tongtong
Ho do hinirim ni rohangkon Ho do pangiring di langkangkon.
3. Dame ni roha nang tuangki Mangolu, mate, Ho jambarhi
Ho do gogongku di dalanki Patongon ahu tu surgo i.

B.E No. 297 NA MARSAK ROHAM BL. 26
1. Na marsak roham Sai jou Debatam
Na burju gogo mangurupi.
2. Habot pe roham Dibahen dosam
Paboa ma i tu Tuhanmu.
3. Na sorat sude Neang do muse
Bahenon ni Jesus na basa.
4. Sorta Tuhanmi Lambok hata nii
Pasonggop tu hasonangan
5. GogoNa do tuk Pamalum luhut
Sahitmu dibahen holongNa.
6. Ibana labam Marujung langkam
Tu paradianan di surgo
7. Sai taon ma benget Sude na hansit
Ai sonang ma ho dibaen Jesus.

B.E. No. No.298 DI LAMBUNGMI O JESUSKI BL.239
1. Di lambungMi o Jesuski Tung na mardame roha i
Maporus holsoholsongki Lam tu tiurna rohangki
Lam ganda las nang gogongki Dung Ho hutanda Jesuski.
2. DilambungMi o Jesuski Sumurut do na gaor i
Ai guru dokMu do sude Galumbang nang alogo pe
Lam sonang do nang rohangki Dung Ho, o Jesus Tuhanki
3. DilambungMi o Jesuski Ndang be margogo musu i
Lam talu do na jahat i Lam monang do na denggan i
O tua ni naung domu i Tu Tuhan Jesus Rajangki.
4. Di ajalhi, o Jesuski Momos ma tiop tanganki
Pasahat au tu surgoMi Marnida hasangaponMi
Endehononku ma disi Holong nang denggan basaMi.

B.E No. 299 DEBATA DO MANGGOMGOMI
1. Debata do manggomgomi Langit dohot tanoon
Haholomon digomgomi Dohot hatiuron on
Dirajai tanganNa i Nasa na tinompa i.
2. Sai hupuji ma goarMu Ala niramotanMi
Tondi dohot pamatangku Sonang au na borngin i
Ndang na saut tinahi ni Musungki sibolis i.
3. Sai padao ma sian ahu Saluhutna dosangki
Ai marhaporusan ahu Tu bugangMu Jesuski
I do pangondinganki Maradophon rimasMi.
4. Sai sungguli ma tondingku Asa hehe dohot i
Jala haringkothononku Hangoluan sogot i
Asa unang ariMi Manonggoti rohangki.
5. Togu au ale Tuhanku Mangihuthon hataMi
Sai pature ma langkangku Asa tung hasea i
Sai ramoti ma au on Asa sonang rohangkon.
6. Tondi dohot pamatangku Roha dohot gogongki
Hupasahat tu tanganMu Debata na sangap i
Jangkon au naposoMon Ai di Ho hian au on.
7. Dokkon surusuruanMu Manundati tahi ni
Na mangago dompak ahu Asa bulus langkangki
Jala usungonna pe Au tu lambungMi muse.

B.E No. 300 TAPUJI MA TUHANTA BL. 12
1. Sai hehe ma rohangku mamuji Debatamu
Na sai marasi roha di nasa manisia.
2. Ai di na modom ahu Sai dijagai do ahu
Aut unang i naung mago Do au dibaen pangago
3. Didok Ho, o Tuhanku Pos ma roham anakKu
Sai sonang ma ho modom Lao do muse na holom
4. Naung saut hataM, o Tuhan Huida haituran
Ndang na mahua ahu Dijaga Ho do ahu
5. Tung aha ma pelean Las ni rohaM hulehon?
Endengku tangiangku I ma pelehononku
6. Ndang i tulakkononMu Diida Ho rohangku
Diboto Ho, o Tuhan Soada na dumengan.
7. Sai udut pinungkaMu Sai suru suruanMu
Manjaga au arian Asi rohaM o Tuhan.
8. Urupi au mangula Ulaon na marguna
Bonana nang ujungna Ho ma mambaen jadina.
9. Patiur ma langkangku Ingani ma rohangku
HataM hangoluanku Di dalan tu lambungMu.

B.E No. 301 LAS SITUTU ROHANGKU BL. 153
1. Las situtu rohangku Ro au manogot on
Mamuji Debatangku Sijaga ngolungkon
Ho di habangsaMi Tongtong naeng pujionku
Huhut pasangaponku Marhite AnakMi.
2. Ai nasa parmaraan Sude na jorbut i
Dao sian au na borngin Binaen ni basaMi
Nuaeng asi rohaM Sai sesa ma dosangku
Sude pambaenanku Na sogo ni rohaM
3. Ramoti au Tuhanku Muse sadari on
Na tau hamagoanku Padao ma i tongtong
Ingani rohangkon Pature ma langkangku
Tamparhon ma marangku Ramoti hosangkon.
4. Tondingku, pamatangku Rap dohot rohangkon
Ro di sude donganku Na di portibi on
Sai sahat ma tu Ho Ramoti ma nasida
Ai na di au luhutna Na nilehonMu do.
5. Paian suruanMu Tongtong di lambungkon
Ai ingkon ramotanMu Do tondingki tongtong
Dibaen pangonggop ni Sibolis di rohangku
Anggiat oloanku Mambahen dosa i.
6. Marguru tu Tuhanku Ma au di sasude
Ditogu Debatangku Ma au tu na ture
Sai pasupasu ma Ulaonku ni tanganku
Sude sibahenonku O Tuhan Debata.
7. Antong hudok ma amen Ndang ganggu rohangki
Tuhanku mangalehon Na hupangido i
Na lao ma au nuaeng Mangula ulaonku
Ibana do dosangku Na sonang au dibaen.

B.E No. 302 BINSAR MA MANOGOT ON BL. 71
1. Binsar ma manogot on O panondang ni Jahowa
Sai sondangi hami on Asa bali sian roha
Sasude na holom i BaenonMi
2. Doshon nambur ma basaM Manonggopi rohanami
Asa asi ni rohaM Mamuati arsaknami
Sai apoi siseanMon Hami on.
3. Dohot holong ni rohaM Manungguli tondinami
Mangihuthon tu hataM Lam holong ma rohanami
Mida Ho dohot sude Jolma pe.
4. Mudar parpadanan i, I ma hatigorannami
Asa roha dosa i Pinabali sian hami
Jala dao na bernit pe sasude.
5. Sondang sian surgo i Binsar tu tanomannami
Molo jumpang ariMi Asa hehe dagingnami
Masuk tu halasan ni Roha i.
6. Jesus, Ho panondang i Sai patiur langkanami
Sian partangisan i Tu silas ni rohanami
Jambar na manongtong di Surgo i.

B.E No. 303 JAHOWA, TUHANKI BL. 149
1. O Jesus Sondang ni Jahowa Amanami
Naung salpu borngin i Tiur huida hami
Tarsunggul do nuaeng Gogongku sasude
Dibahen i umbaen Di Ho malungun i.
2. Tung aha di rohaM Huboan peleanMu ?
Tu asi ni rohaM Hubonom ma rohangku
Nang tondi daging pe Manipat ari on
I ma peleanMi Na asing ndang adong.
3. Ipe o Tuhanki Sai jalo ma tondingku
Ho ma nampuna i Padomu tu TondiMu
Di holong ni rohaM Di Ho ma rohangki
Gomgoman ni hataM Baen hasangaponMi.
4. Nang pe pamatangkon Hulehon ingananMu
Tagan di tano on SiparbadiaanMu
O Jesus Tuhanki Rajai pangolu au
Ai molo songon i Mardomu Ho tu au.
5. Uloshon Jesuski Tu au ma hatigoran
Holong ni rohaMi Dohot haporseaon
Benget ni roha i Nang haiashon pe
Serep ni roha i Na uli sasude.
6. Sai pasupasu ma Sude pambahenanku
O Tuhan Debata nang nasa pingkiranku
Sai naeng marsangap Ho Dibaen hatangku pe
Paboa di Ho Do gogongki sude.

B.E No. 304 O JESUS PANONDANG BL. 143
1. Naeng ma pujionku Di manogot on
Ho ale Tuhanku Di na ngot au on
Di na nok matangku Diramoti Ho
Au ro di donganku Asa sonang do.
2. Gogo ni dagingku Dipasuang Ho
Siulahononku Ari on naung ro
Dohot do rohangku Diramoti Ho
Tiur do matangku Manatapi Ho
3. Jesus pargogoi ma Au sadari on
Sai padao ma dosa Sian rohangkon
Asa huihuthon HataMi tongtong
Jala hupasangap Ho di tano on.

B.E No. 305 HUPUJI HUPASANGAP HO BL. 128
1. Ale tondingku hehe ma Dung salpu haholomon
Ai dipabinsar Debata Muse panondang bolon
Pasohot ma na modom i Ai ingkon pasangaponMi.
Tuhanta na di surgo
2. Di hatiuron lao sude Tumopot ulaonna
Sogot do angka pidong pe Pangiar soarana
Tama do i tiruan ni Saluhut manisia i
Mamuji Debatana.
3. Tatopot ulaonta be Baen sangap di Tuhanta
Sai hehe hita sasude Paboa las rohanta
Mamangke hagogoon i Nilehon ni Tuhanta i
Tu hita saluhutna.
4. Marsorinsorin ari i Sai tading do ulaon
Urupi Jesus hami be Mangalo haotoon
Paringgas hami on sude Mamangke gogonami be.
Dibaen naung sinondangMu.
5. Torang baen rohanami be togu haporseaon
Paserep rohanami pe. Sai lehon roha holong
Tu hami asa tung tanda naung dipatiur
Debata Huhut disunggul hami.
6. O Sondang salelengna i Sai mian dirohangku
Di dalan hatigoran i Papintor ma langkangku
Pasahat au tu huta i Naung dipauli tanganMi .
Soada be na holom

B.E No. 306 HUPUJI HO, ALE TUHANKU BL. 112
1. Hupuji Ho ale Tuhanku Ai borngin i do dipasalpu
Ho, asa tung tiur muse Portibi on naung nilinggoman
Ni harajaon haholoman Torang dibahen Ho sude.
2. Sai hehe ho, ale tondingku Pelehon ma tu Debatamu
Mauliate ni roham. Tandai ma denggan ni basaNa
Na ganup sogot tinongosNa Girgir ma puji Debatam.
3. On do sinangkap ni rohangku Tiur dibahen Debatangku
Na dibagasan rohangki Suman tu langit ma rohangku
Jesusku, mata ni aringku Baen sangap di Debatangki
4. Anggiat bali, ale Tuhan Sude pambaenan haholomon
Sian rohangku dibaen Ho Huhut imbaru pingkiranku
Dihorhon Jesus panondangMu Papintor langkangki tu Ho.
5. I ma nuaeng pangidoanku Sai lehon i di au Amangku
Sai dok ma : Amen, saut ma i. Antong dung gok ariaringku
Panondang Ho ma topotonku Sonang ma au di lambungMi.

B.E No. 307 MATA NI ARI BL. 208
1. Mata ni ari Binsar saonari Lao manondangi Lao manorangi
Mangalaslasi sandok tano on. Dipodomanku Na borngin badanku
Hehe ma ahu Nuaeng asa laho Asa huida tiur ari on
2. Nasa na uli Na pinauli Ni Debatangku Diida matangku
Na marmulia do Debatangki Laos na hutanda Huhut na huida
Jambar na uli Ni angka na muli Sogot tu lambung ni Tuhanta i.
3. Sai taendehon Ma hasangapon Di Debatanta. Jala rohanta
Sai tapelehon tu Tuhanta i, I ma pelean Na tongtong dumenggan
Endeendenta Do doshon daupa Lomo ni roha ni Tuhanta i.
4. Borngin, arian Do sinarihon Ni Debatanta Hasonanganta
Pinatupa sambing do tongtong Modom pe hita Disi do Ibana
Hehe dagingta Sogot manogotna Sai disondangi muse hita on.
5. Las ni rohanta Sian Tuhanta Nang pe arsakta Do tinongosNa
Sai na hasea do i sasude Hangoluanta Dilehon Tuhanta
Asal ditogu do hita tu surgo Ingkon manumpak tusi sasude.
6. Sai na marujung Do haporsuhon Dung salpu borngin
Dung pur pe angin Sai na sumisi ma ombun sude
Las ma rohanta Dibahen Tuhanta Di hasonangan
Di banuaginjang Ia dung sahat tusi hita be.