BUKU ENDE NO.193 SD 243

B.E No. 193 MARIBAK LANGIT BL. 193

1. Maribak langit ni langitan Dibahen holong ni rohaM
Di hami angka na hansitan Papatar denggan ni basaM
Diida nasa manisia Pangisi ni portibi on
Ro Ho, o Jesus na badia, Humophop hajomaon on.
2. Diporsan Ho do nasa dosa Ni manisia sasude
I ma umbaen marutang hosa Ho,manggarari i sude
Ditaoni Ho do hamatean Di hau na pinarsilang i
Pamasuk hamion, manean Na uli na di surgo i.
3. Mauliate ma rohangku Di Ho, o Jesus Tuhanki
Naung sae do saluhut dosangku Binaen ni hamamateMi
Malua sian hamagoan Do au binaen ni asiMi
Hupuji goarMi, o Tuhan Saleleng ni lelengna i.
4. Antong Ho ma nampuna ahu Saleleng au di tano on
Denggan ma au marpangalaho Pasangap goarMi tongtong
Sai tiruonku ma pambaenMu Mangkaholongi dongan i
Seahononku ma diringku Maniru Ho, o Tuhanki.


B.E. No.194 AUT SO ASI ROHAM BL. 62

1. Aut so asi rohaM Aut so godang basaM Tu dia au?
Alai dibaen basaM Dohot asi rohaM Tu surgo au
2. Mauliate ma Di Ho o Debata Ala basaM
Sibahen dalan i Marhite AnakMi Tu banuaM
3. Anggiat ma holong Rohangku sai tongtong Burju tu Ho
Sai dongananMu au Manang tu dia lao sonang tutu
4. Disuru AnakMi Tu au Tondina i Na sian Ho
Manogu tondingki Tu hasonangan i Pinuji Ho


B.E.No. 195 HOLONG DO ROHA BL. 140

1. Holong do roha Ni Debatangku Holong rohaNa tongtong di au
Ai dipatupa do Haluaonku Marhite Jesus AnakNa i.
2. Tarihot ahu dibahen dosa Na so tarbahen malua au
Dibahen i hudok : Holong do roha Ni Debatangku Tongtong di au
3. Peak do ahu Di hamatean Dibaen sibolis pangago i
Dibahen i hudok : Holong do roha Ni Debatangku Tongtong di au
4. Na ro do Jesus Pardameanku Parmahan bolon na burju i
Dibahen i hudok : Holong do roha Ni Debatangku Tongtong di au
5. Ditaoni Jesus Do hamatean Manggarar utang ni dosangki
Dibahen i hudok : Holong do roha Ni Debatangku Tongtong di au
6. Mangolu ahu Binaen ni hata Ni Tuhan Jesus tu tondingki
Dibahen i hudok : Holong do roha Ni Debatangku Tongtong di au
7. Hangoluanku Tongtong hatana Sombu uashu binahen ni
Dibahen i hudok : Holong do roha Ni Debatangku Tongtong di au
8. Tonggi do holong Ni Debatangku Na tau mangapul rohangkinon
Dibahen i hudok : Holong do roha Ni Debatangku Tongtong di au
9. Na dipamalum HaholongonNa Sude na bernit ni rohangki
Dibahen i hudok : Holong do roha Ni Debatangku Tongtong di au
10. Marlasniroha Huhut mardame Do au dibahen holongNa i
Dibahen i hudok : Holong do roha Ni Debatangku Tongtong di au
11. Sai teanonku Do hasonangan Ro di salelenglelengna i
Dibahen i hudok : Holong do roha Ni Debatangku Tongtong di au
12. Sai pujionku Do roha holong Pinatuduhon Ni Debata i
Dibahen i hudok : Holong do roha Ni Debatangku Tongtong di au


B.E No.196 SAI HUJAHA DI PUSTAHA BL. 23

1. Sai hujaha di pustaha Padan na imbaru i,
Na tongtong lambok rohana Na so marpangansi i.
2. Panjangkonna di dakdanak Na pinarhamaolna i
Panjamana di nasida Angka na hinaolna i
3. Dohot asi ni rohaNa Di na marsitaonon i
Parmulia ni tanganna Pabalihon begu i.
4. Panjangkonna di pardosa Na magopu roha i
Pangapoina di nasida Paubahon roha i.
5. Tung lambok do ditogihon Angka dorbiana i
Asa sahat boanonna Tu banuaginjang i.
6. Ingkon tongtong jahaonku Padan na imbaru i
Naeng tangkas ma botoonku Holog ni rohana i.


B.E.No.197 NA MARMAHANI HITA BL. 8

1. Na marmahani hita Parholong roha i
I ma Tuhanta Jesus Silehon tua i, Silehon tua i
2. Ditatap pardangolan Ni manisia i
Soada hasonangan Na lilu do sude, Na lilu do sude
3. Alai ro ma Ibana Tu hasiangan on
Manobus huriaNa Humophop hita on, Humophop hita on.
4. Dirina dipasahat Tu hamatean i
Ibana gabe singkat Ni manisia i, Ni manisia i
5. Dibahen i, o jolma Naung sae do dosami
Ai molo ho porsea Taruli ho disi, Taruli ho disi.
6. Antong hamu na loja Binaen ni dosa i
Sai ro hamu sudena Tu Tuhan Jesus i, Tu Tuhan Jesus i.
7. Sai naeng pasonangonna Hamuna sasude
Sai naeng togihononna Hamu tu surgo i, Hamu tu surgo i

B.E.No. 198 AUT UNANG HO BL. 46
1. Aut unang Ho jambarhu ale Jesus
Aut so mudarMu mangondihon ahu
Tung na tu dia nama au pardosa Marhaporusan?
2. Ai ndang adong be songon Ho Tuhanku
Na mamuati arsak ni rohangku
Sasada Ho do Sipasonang ahu Hangoluanku.
3. Dibahen i hupuji ma goarMu
Ai dohot au ditaiti Ho Tuhanku
Tu parpunguan ni na hinophopMu Dohot mudarMu.

B.E. No.199 TIBU MA JUMPANG TINGKI BL.132
1. Sai ingot Jesus, Tuhanmi Naung ro tu hita jolma
Na tumadingkon surgo i, Na gabe dongan jolma
Sai unang halupahon i, Ai i do hangoluanmi Sai puji ma Ibana
2. Sai ingot Jesus, Tuhanmi sitaon godang na bernit
Di hau pinarsilang i, humophop ho parsahit
Ai ho tama manaon sude, na mangonai tu Jesus i, Sai puji ma Ibana
3. Sai ingot Jesus, Tuhanmi Na hehe do Ibana
Di ari patoluhon i Rumar do tanomanna
Ai ala ni tarbahen do Mangolu sogot dohot ho Pasangap ma Ibana
4. Sai ingot Jesus, Tuhanmi Na sangap do Ibana
Manaek muse tu surgo i Tu lambung ni AmaNa
Inganan hasonangan i Rade di ho dibaen disi Tangihon ma hataNa.
5 .Sai ingot Jesus, Tuhanmi Ai mulak do Ibana
Muse, manguhum jolma i Tangkas didok hataNa
Pature ma roham tongtong Saleleng ho di tano on Pasangap ma Tuhanmu.
6. O Jesus tatap ma au on, sondangi ma rohangku
Urupi au di tano on, maniru Ho, Rajangku.
Uhirhon ma tu rohangki. GoarMu na badia i, Pamasuk au tu surgo.

B.E. No. 200 DI SURGO DO ALEALENTA BL.106
1. Di surgo do Alealenta na burju roha situtu
Ndang piga di banua tonga donganta na tongtong burju
Antong tabaen ma Jesus i, tongtong Alealenta i.
2. Na meoleol songon arung do dongan na di tano on.
Na hot do Jesus na sumurung, donganna pe hot do tongtong.
Antong tabaen ma Jesus i, tongtong Alealenta i.
3. Sai marpambuat angka dongan di holong ni rohaNa i
Hape ianggo so dapotan bolong do parsaoranna i
Antong tabaen ma Jesus i, tongtong Alealenta i
4. Humophop hita do tinaonNa Na bernit i di Golgata
Sude dosanta pinorsanNa Pasaehon i tu Debata
Antong tabaen ma Jesus i, tongtong Alealenta i
5. Sai dingkan hita do rohaNa Sintong do parsaoranNa i
Manongtong holong ni rohaNa Di nasa na niainNa i.
Antong tabaen ma Jesus i, tongtong Alealenta i
6. O Jesus Alealenami, sai tiop tangannami be.
Tongtong rajai ma rohanami, tu surgo togu hami be.
Di si ma hot parsaoran i, saleleng ni lelengna i.

BE No.201 NA MARTUNGKOT SERE AU BL. 168
1. Na martungkot sere au Di dalanku tu na dao
Sian surgo i do ro Surgo i ditudu do
I ma haporseaonku Na pahothon pardalanku
Na patogu langkangki Sahat ro di surgo i.
2. Sada pardisurgo i Do disuru Tuhanki
Manginganhon rohangkon Mangajari au tongtong
I ma holong ni rohaNa Sian denggan ni basaNa
Do dilehon i tu au Asa unang mago au.
3. Marsinondang do tongtong Dibagasan rohangkon
Sada bintang na torang Na mambahen au sonang
Pangkirimon ni rohangku I ma sian Debatangku
Patiurhon dalanki Tu banuaginjang i.

B.E. No. No. 202 HUHAHOLONGI HO BL.102
1. Huhaholongi ho gogongku Huhaholongi ho tongtong
Marhitehite pambaenanku Nang sian nasa rohangkon
Ai Ho do sumondangi au Ro di na mate au
2. Huhaholongi ho ngolungku Ai Ho do alealengki
Sai naeng tongtong Ho pujionku Saleleng au sinondangMi
Holong mamolin rohangki Di Ho o Jesuski.
3. Tung so jumolo Ho hutanda Ro di na hinauliMi
Tung so jumolo Ho huida Ho arta na sumurung i
Na marsak au huhut tungki Dibahen otongki
4. Na lilu au huhut mapitung Umbaen na so hutanda Ho
Na sorat au dibaen huusung Sude pardosaonku do
Alai nuaeng mananda do Rohangkinon di Ho
5. Mauliate ma rohangku Di Ho na manodangi au
Hupuji Ho, ale Tuhanku Dibaen na tinangkupMu au
Hisar do tondingki dibaen Hutan Ho nuaeng.
6. Tongtong ramoti ma langkangku Di dalan hatigoran i
Huhut sai pargogoi rohangku Mangaradoti hataMi
O Sondang sian surgo i Sondangi rohangki
7. Huhaholongi Ho tumpalhu Ho Debatangku na tutu
Manang beha parsorionku Ihuthononku Ho burju
Haholonganku Ho tongtong Nang tos pe hosangkon

B.E. No. No. 203 HOLONG DO ROHANGKON DI HO BL.225
1. Holong do rohangkon di Ho Sai unang mandaodao be Ho O Tuhan sian ahu
Ndang dihalashon rohangkon Nang aha pe di tano on Naeng Ho sambing di ahu
Ai manang tos pe hosangki Sasada Ho haposanki Na mangapuli rohangki
Naung dipaias mudarMi O Jesuski Debatangki, Debatangki Parbadiai ma tondingki.
2. Ai holan denggan basaMi Do daging dohot tondingki Ro di sude artangku
Antong, asi ma rohaMi Ajari au, mamangke i Baen sangap di goarMu
Tongtong padao ma sian au Sude na tau mangago au Huhut pabenget rohangki
Manaon sude na porsuk i O Jesuski Debatangki , Debatangki Palambok hamamatengki.
3. Sai dokkon ma suruanMi Mangusung au tu lambungMi Ianggo ro ajalhu
Disi papodom dagingkon Sinok didalom tano on Paima ro ariMu
Dung i sungguli au muse Marnida bohiMi tahe Palas ma rohangki tongtong
Parasiroha di au on O Jesuski Tangihon on, tangihonon Asa hupuji Ho tongtong.

B.E No. 204 NDANG TADINGKONONKU HO BL. 73
1. Ndang tadingkononku Ho Ale Jesus Sipangolu
Naeng ihuthononku do Ho saleleng au mangolu
Ho do hangoluanki Ndang tadingkononku i.
2. Nasa na nilehonMi Tondi ro di pamatangku
Hosa dohot gogongki Ro di saluhut artangku
Hupasahat i tu Ho Na so unsatonku do.
3. Nang lam buruk dagingki Nengel pinggol, rambon mata
Majal pangkilalanki Dila so malo marhata
Tanda ajalhi naeng ro Jesus tioponku do.
4. Laos hutiop Jesuski Molo sahat au tu surgo
Molo idaonku i Naung huhirim i di tano
Las ma rohangki disi Mida Jesus Tuhanki.
5. Laos Ndang be mangapian au Di na masa di na rodop
Sai tu ginjang nama lao Tondingki marolopolop
Jesus Ho do jambarhi Salelenglelengna i.

B.E. No.205 NA DISON DO AU TUHANKU BL. 90
1. Ale Jesus Tuhannami Bereng hami na dison
PinarmahanMi do hami Saluhutna na dison
Sai asi rohaM di hami Sai pangolu hami on
2. Ale Jesus, togu hami Asa unang mago be
Manang ise sian hami Sai porsea ma sude
Sai na hot di Ho ma hami Dao ma jea sasude.
3. Disangkapi rohanami Naeng malua situtu
Sian pardosaonnami Asa sai tongtong burju
Sai urupi rohanami Asa ias situtu.

B.E. No. 206 NA DISON DO AU TUHANKU BL.90
1. Na dison do au Tuhanku Na marsomba au tu Ho
Iluilu ni matangku Husombahon do tu Ho
RohaMi ma tu rohangku Na masihol au di Ho.
2. Sai matahon au Tuhanku Sai rajai ma diringkon
Ho hinirim ni rohangku Sipangolu tondingkon
Rohami ma tu rohangku Ho di au,di Ho au on.
3. Ndang adong pangidoanku Dungkon asi ni rohaM
Na dilehon Ho, Tuhanku Tu na unduk di hataM
Rohami ma tu rohangku Sai pasauthon ma hataM
4. Ho do mata ni aringku Halalas ni rohangki
Na masihol do tondingku Di Ho Jesus Tuhanki
RohaMi ma tu rohangku Asa sabam rohangki
5. Sai tangihon, ditangishon Rohangki dangolna i
Sai tangihon , ditangishon Tondingki siholna i
Rohami ma tu rohangku Sai di Ho ma tondingki.
6. Hamaoraon, halilian Roha ni portibi on
I do tongtong parsahitan Situtu di tondingkon
Holan Ho huhalungunhon Hutundalhon tano on.

B.E No. 207 SAI TIOP MA TANGANKU BL. 150
1. Sai tiop ma tanganku Sai togu au
Paima tos hosangku Ramoti au
Ndang olo au mardalan sasada au
Sai Ho ma ale Tuhan Manogu au.
2. Baluti ma rohangku Na marsak i
Tu asi ni rohaMu Na godang i
Sai sesa ma dosangku Asa tongtong
Guru di Ho rohangku Tu jolo on.
3. Ianggo hasusaan godang do i
Alai pangkilalaan sonang do i
Na tiur do rohangku Nang pe holom
Niida ni matangku Di tano on.
4. Di lambung patMu Tuhan Di joloMon
Sai loas maradian SiseanMon
Pipit hubaen matangku Maniop Ho
Ai sonang do rohangku Mardongan Ho
5. Sai tiop ma tanganku Sai togu au
Paima tos hosangku Dongani au
Pabulus ma langkangku Tu surgo i
Ho ma pasangaponku Tongtong disi

B.E No. 208 ALE DONGAN NA SAROHA BL. 180
1. Ale dongan na tarhurung Di bagasan dosa i
Hangoluan na sumurung Sibaritahononki
Dipapatar Debatanta Asi ni rohaNa i
Ai disuru do AnakNa Baen hangoluanta i
2. Pangondian do AnakNa Naung ro tu portibi on
Paluahon sian dosa Hita na marjea on
Jesus Kristus i do goar Ni pangondinganta i
Ai Ibana do manggarar Utang ni pardosa i.
3. Jesus Kristus do manogu Au tu hasonangan i
Diarahon do tondingku Tu hasangaponNa i
Asa unang be marlea Au na bojok roha on
Jala dao sudena jea Na mangago rohangkon.
4. Ia ro pe hamatean Jesus mangapuli au
Di na songgop paruhuman Jesus mangondihon au
Aha be habiaranku ? Jesus do haposanki
Ala ni sai pujioku Holong ni rohaNa i.

B.E No. 209. NA SONANG AU BL. 136
1. Na sonang au dung na mar Tuhan au Tu Tuhan Jesus i
Ai ndang adong dung naposoNa au Siholsohononki
Ibana nama huihuthon Portibi on ma hutundalhon
Na sonang au, Na sonang au.
2. Na sonang au Bolong do sasude Na mangarsahi au
Las rohangki nuaeng nang sogot pe Diapul Jesus au.
Ndang huholsohon be ngolungku Sude do guru di Amangku
Na sonang au, Na sonang au.
3. Na sonang au. Burju do Amangki. Na manarihon au
Huhut basa, sude na ringkot i Dilehon do tu au
Parbegu do na humolsohon Ngoluna dohot sipanganon
Au sonang do, Au sonang do.
4. Na sonang au. HarajaonNa do Ro di ruhutna i
I ma antong na hujalahi do Sude dapot disi
Sai on ma sangkap ni rohangku Pasauthon roha ni Amangku
Na sonang au, Na sonang au
5. Na sonang au. Na maradian au Di ampuanNa i
Na bernit i maporus sian au Hudai holongNa i
Nuaeng sinolom ni rohangku Naeng surgo i ma bongotanku
Martua au, Martua au

B.E. No. BE. 210 O TUHAN NA MARASI ROHA BL.100
1. O Tuhan na marasi roha, na so tardodo jolma i
Torop do halak sipardosa, na rap mamuji goarMi
Dibaen basaM na godang i, marhitehite Jesus i.
2. Dibahen Ho do pardengganan, pasaehon dosa i sude.
I do manghorhon haluaon, di hita na tarjea i
I pe mauliate ma au on di Ho o Debata.
3. Naung ro do Tondi Parbadia Tu huriaM sinuruMi
Manunggul roha na porsea Di nasa na pinillitMi
Mamuji Ho do ala ni Rohangku na imbaru i
4. Mauliate ma rohangku, dibaen na pinarbagaMi
Ndang olo asi ni rohaMu mansohot salelengna i
Sai hot do padan binaenMi. Nang pe na sego sasude.
5. Nang hangoluan, hamatean Na hansit nang na porsuk i
Na so tarbaen do i manirang Au sian hahoholongMi
Na dibagasan Jesus i Ai na burju do rohaMi.

B.E No. 211 TUHAN JESUS SIPARMAHAN BL. 92
1. Tuhan Jesus Siparmahan Au birubiruNa do
Jesus gok di Ho rohangku Sai ihuthononku Ho
Sai ihuthononku Ho, Sai ihuthononku Ho
Jesus gok di Ho rohangku Sai ihuthononku Ho
2. Jumpa masa sorimago Tung pangapul Ho gogo
Ia bogasMi huida Sai ihuthononku Ho
Sai ihuthononku Ho, Sai ihuthononku Ho
Ia bogasMi huida Sai ihuthononku Ho
3. Dokkon ahu suruanmu Ai hatam so magopo
Dung i Ho huhut manogu Donganki manopot Ho
Taiti ma sude tu Ho Taiti ma sude tu Ho
Sai asi rohaM sai togu Sahat ma sude tu Ho

B.E No. 212 HAHOLONGON NA BADIA BL. 24
1. Haholongon na badia Sian Tuhan Jesus i
Sai songopi sai bongoti Roha dohot tondingki
2. Las ni roha ni na sonang Di banuaginjang i
Sai pasonang sai pasabam Sihol na di rohangki
3. Hasonangan hadameon Na ro sian Jesus i
Sai pahosa au na loja Asa bulus rohangki
4. Sai palambas ma rohangku Dompak angka dongan i
Asa tung ringgas rohangku Lao manesa dosa nii.
5. Habasaron hadameon Na ro sian Tuhanki
Gohi roha dohot tondi Unang munsat sian i
6. Haholongon sian Jesus Sai paias rohangkon
Sai pabali nasa tihas Asa ias tondingkon
7. Antong ale Debatangku Sai pagomos rohangki
Asa tolhas au tu lambung Ni sude na monang i.

B.E No. 213 DUNG SONANG ROHANGKU BL. 115
1. Dung sonang rohangku dibaen Jesus i Porsuk pe hutaon dison
Na pos do rohangku di Tuhanta i Dipasonang tongtong rohangkon
Sonang do, sonang do Dipasonang tongtong rohangkon
2. Nang dihaliangi sibolis pe au Naeng agohononNa muse
Naung mate Tuhanku Mangolu ma au Utangki nunga sae sasude
Sonang do, sonang do Dipasonang tongtong rohangkon
3. Diporsan Tuhanku sandok dosangki Bolong tu na dao do dibaen
Nang sada na so jujuronna be i Na martua tondingku nuaeng
Sonang do, sonang do Dipasonang tongtong rohangkon
4. Mangolu nang mate di Jesus do au Ibana haporusanki
HataNa sambing do partogi di au Ai na tau haposanku do i
Sonang do, sonang do Dipasonang tongtong rohangkon

B.E. No.214 SONANG DI LAMBUNG JESUS BL.161
1. Sonang di lambung Jesus Sonang na ro tusi
Unang be ho mabiar Lao mandapothon i
Tongtong dijouhon Jesus Sai ro ma ho tu Au
Tadingkon haholomon Jala haposi Au
Sonang di lambung Jesus Sonang na ro tusi
Unang be ho mabiar Lao mandapothon i
2. Sonang di lambung Jesus Rap hita lao tusi
Inganan na ummuli Do di lambungNa i
Ai nunga diparade hasonanganta i
Asa marhasonangan Na ro tu Jesus i
Sonang di lambung Jesus Rap hita lao tusi
Inganan na ummuli Do di lambungNa i
3. Jesus haholonganku Jesus haposanki
Saleleng au mangolu Dohot di tingkingki
Ndang be huhabiari Angka pangago i
Ai diramoti Jesus Au hinophopNa i.
Jesus haholonganku Jesus haposanki
Saleleng au mangolu Dohot di tingkingki

B.E No. 215 NA MARTUA NINNA JESUS BL. 88
1. Na martua ninna Jesus Jesus Na pogos tondina i
Ai langkana do na tulus Tu banuaginjang i
Sai na sonang roha ni Na manggolom hata i
2. Nang na marsak pe tarbahen Sonang do rohana i
Ai arsakna i mambahen Ro na mangapuli i
Sai na sonang roha ni Angka naung tarapul i.
3. Na martua do dohonon Na lambok marroha i
Ai nasida do manean Nasa na di tano i
Sai na sonang roha ni Na mangalo rimas I
4. Molo mauas tondimuna Mida hatigoran i
Na martua do hamuna Ai tutu ma jumpang i
Sai na sonang roha ni Na marhatigoran i
5. Angka na marasi roha Ninna Jesus Tuhan i
Angka i do siasian Balos ni asina i
Sai na sonang roha ni Siasii dongan i
6. Angka na lidang marroha Na so saor tu dosa i
I do na tarbaen marnida Ama na badia i
Sai na sonang roha ni Na pasiding dosa i
7. Angka na manuan dame i dietong Debata
Songon anak ai nasida Sada dohot Debata
Sai na sonang roha ni Na mambahen dame i
8. Dohot angka na binuru Ala hatigoran i
Sipujion ai marguru Tu porsukna upa nii
Sogot di na sonang i Mullop ma tuana i.

B.E. No.216 GARGAR DOLOK BL.89
1. Gargar dolok tapor batu Ndang na gargar asi ni
Roha sian Debatangku Sai na hot padanNa i
Asi ni rohangKu do Ndang na munsat sian ho
2. Na nidok ni Debatangku Patut huundukkon i
Sai mangolu do tondingku Molo huihuthon i
Asi ni rohangKu do Ndang na munsat sian ho
3. Saluhutna na dung loja Mangulahi do gogo
Sonang jala las rohana Ia diasangkon do
Asi ni rohangKu do Ndang na munsat sian ho
4. Marsak ala ni dosamu Bobos mida uhum ho
Sai haposi ma Tuhanmu Na tongtong mandok tu ho
Asi ni rohangKu do Ndang na munsat sian ho
5. Sai patogu ma rohangku O Tuhan di hataMi
Unang pola au be ganggu Paima bagabagaMi
Asi ni rohangKu do Ndang na munsat sian ho
6. Ia ro pe hamatean Di na suda bohalhi
Hangoluan ma hutean Sian na mandokkon i
Asi ni rohangKu do Ndang na munsat sian ho

B.E No. 217 JAHOWA DO DONGANKU BL. 248
1. Jahowa do donganku Tung ise alongki ?
Tangiang ni rohangku Padaohon musu i
Hasian ni Debata Au Kristus ulungki
Tung aha hatahata Ni panginsahi i ?
2. Ai damang do Jahowa Hupuji i tongtong
Sai i digolom roha Marningot na holong
Do roha ni Natimbo Tuk do gogoNa i
Mambuat nasa holso Pasonang rohangki
3. Mudar ni Tuhan Jesus Panalom rohangki
Ai i do na pabulus Dalan tu Ama i
Artana do na maol Na nilehonna i
Unang pinarhamaol Ngolu ni daging i.
4. Jesus hasangaponku Sondang ni tondingki
Aut unang i huboto Nda mago au boti ?
Dibaen habadiaon Ni Natumimbul i
RimasNa ndang tartaon Na songon api i.
5. Ndang be marhinamago Au dung ro Jesuski
Soada na mangago Hinaholonganki
Tongtong sonang rohangku Di na lao mate pe
Tu surgo do langkangku Uhum ndang jorbut be
6. Tondina do disuru Manggohi rohangkon
Ibana huparguru Palambok dangolhon
Dibaen pasupasuna Umbaen mananda au
Di Ama i, tung sura Na hurang boto au.
7. Ibana mangajarhon Luhut tangiang i
Ibana patolhashon Na pinangidomi
Tu Debata Amanta Hurang pe rohaMi
Ibana padas hata Sandok na malo i.
8. Ibana pangapuli Di na marilu i
Sambulo pe na uli Na pinarade ni
Amanta na di ginjang Dipatuduhon do
Molo dung so marlindang Jala ndang ganggu ho.
9. Ingkon marlasniroha Tongtong au ala nii
Ai nunga dao na roa Di Ho au Jesuski
Ho mata ni aringku Ho las ni rohangki
I pe di Ho dagingku Di Ho nang tondingki.

B.E No. 218 TONG DO TAU HAPOSAN BL. 146
1. Tong do tau haposan Tuhan Jesus i
Ala naung diporsan Do dosanta i
Hata nang dameNa Hangoluan ni Angka na porsea Di hataNa i.
Hata nang dameNa Hangoluan ni Angka na porsea Di hataNa i.
2. Sai tong didongani Na porsea i
Jala ganup ari Ro basaNa i
Tu na so marganggu Di gogoNa i Na mandok Tuhanku Na sun denggan i
Tu na so marganggu Di gogoNa i Na mandok Tuhanku Na sun denggan i
3. Guru di Ibana Sude tano on
Sintong do hataNa Na tu hita on
Asi ni rohaNa Na sumurung i Dipatongontongon Tu lomoNa i.
Asi ni rohaNa Na sumurung i Dipatongontongon Tu lomoNa i.
4. Ale Tuhannami Sai sondangi ma
Sude dongannami Na di Sumatra
Dohot halak Nias, Halak Borneo , Asa tung lam ias Lao managam Ho.
Dohot halak Nias, Halak Borneo , Asa tung lam ias Lao managam Ho.
5. Nang pe angka jolma Na di Afrika
Ro di halak Sina Dohot Asia
O Jesus panondang Sai sondangi ma Asa ro marsomba Tu Ho,Debata.
O Jesus panondang Sai sondangi ma Asa ro marsomba Tu Ho, Debata

B.E.No.219 ISE DO ALEALENTA BL.183
1. Ise do alealenta Na so olo muba i ?
Aleale na sumurung I ma Tuhan Jesus i
Ai torop pe aleale Na di hasiangan on
Saluhutna i mansadi Molo mate daging on
2. Hahaangi dohot tondong Na marholong roha i
Aleale dohot dongan Tading do sudena i
Nang pe dipataru hita sahat tu udean i
Laho do muse nasida Ditadingkon bangke i.
3. Anggo Jesus, sai diingot Do alealeNa i
Nang tondinta pe diingot Sahat tu ajalta i.
Tatadingkon pe luhutna Na di hasiangan on
Dapotonta di lambungNa Hasonangan na tongtong

B. E No. 220 NDANG JUMPANG HIAN BL. 142
1. Ndang jumpang hian hatorangan ni i Pardagang di dalan na tu surgo i
Marhite sangkapna pingkiranna i Aut unang Tuhanta haposanta i.
2. Dung loja roham dibaen dosami Hurangan di dame do nang rohami
Tu Golgata boan, mangelek ma ho Porsea di Jesus Tuhanta ma ho.
3. Masihol do ho di na tiur i ? Dihoihon roham na so tau ho tusi
Na ro do parasi na sumurung i Mandok ho na dangol sai pos rohami
4. Sude rohami ditanda hian Na masa di ho sai didasing hian
Luhut tu na denggan di ujungna i Ditumpak sasudena i.
5. Sai tong do bulus di hita sude Ai Jesus na tuk patundukkon sude
Biar pe rohanta nang golap pe i Haposi Tuhanta partogi do i.
6. Antong unang be mandele roham Adong na ringgas sumarihon langkam
Ai Tondi ni Jesus patiur roham Mangkirim ujungna na tongtong sonang
7. Ai molo dung ro marujung langkam Sai monang ma ho sai ditiop roham
Porsea di Jesus partogi di ho Tu ginjang tu surgo diboan do ho.

B.E No.221 SALELENG JESUSKI BL. 5
1. Saleleng Jesuski Na mandongani au
Maporus holsoholsongki Sai di Ibana au
2. Parmahan Jesuski BirubiruNa au
Ditogutogu tondingki Ndang be marmara au
3. Sai dipatongon au Tu hasonangan i
Diiringiring Jesus au Mardalan lao tusi
4. Torop di tano on Mangkaliangi au
Sai Tuhan Jesus do tongtong Maniopniop au.
5. Naeng tarsulandit au Di maol ni dalan i
Hatop ma lao tu Jesus au Pamalum rohangki
6. Hubereng ma tongtong Jesusku tumpalhi
Ibana tua na tongtong Na so mansohot i.

B.E No. 222 TU JOLO NI TUHANKU BL. 163
1. Tu jolo ni Tuhanku Huboan diringkon
Ibana do Rajangku Sigomgom rohangkon
Sai guru di Ibana Sudena langkangki
Sai asi ni rohaNa Pature bogashi.
2. Ai nang pe au targogot Hutatap Rajangki
Sai ro do ganup sogot Pangurupina i
Na so pasombuonNa Di pangunjunan i
Sai saut paluaonNa Na hinophopNa i.
3. Tutu, ndang sai mansohot Tompu na mohop i
Sipata leleng lohot Tu au na dokdok i
Alai gogongku ganda Mamorsan silang i
Tuhanku do hutanda Jonok di lambungki
4. Ditiop do tanganku Sai dihehei do au
Sai tong jonok Tuhanku Ndang dung Ibana dao
TondiNa patorangkon Tu au holongNa i
Sai lam huhadengganhon hansit ni silang i.
5. Di holong ni rohaNa Dibuhul tingkingki
Disi do alaponNa Au tu lambungNa i
HolongNa pujionku Tung salelengna i
Siala sitaonon NiampehonNa i.

B.E No.223 HUSOMBA HO TUHAN BL. 244
1. Husomba Ho Tuhan tangihon au
SangkapMu ma tongtong pasaut tu au
Lam ganda baenon ni i, holong ni rohangki
Sai lam gandai holong tu Ho
2. Uju na lilu au Dao sian Ho
Sai dilului Ho au Laos jumpang do
Ala ni holong do Rohangkinon di Ho
Sai lam gandai holong tu Ho
3. Di na targogot au hansit huae
Ho na mangapul au tu Ho au lao
Haposanki do Ho, Ho Sipangolu do
Sai lam tambai holong tu Ho
4. Ia tung jumpang ma Ro ajalhi
Asi rohaM nama Di tondingki
Na las do rohangki Marnida bohiMi
Di lambungMi Di surgo i.

B.E No. 224 JALO TANGANKU BL 232
1. Jalo tanganku tiop au o Tuhan Ai na gale au so mardongan Ho
Rap dohot Ho hipas do au mardalan Mamolus parmaraan sonang do
2. Sai togu au, sihol di Ho rohangku Naeng lam sumolhot au tu lambungMi
Ai unang i, mura dope au lilu Manimbil sian hasintonganMi.
3. Ajari au, urmun dope huida Maol hantusi pambaenMi sude
Dung pe ro songgop Tondi Parbadia Tangkas huida Sasude ture
4. Urupi au di ujung ni langkangku Mamolus rura hamatean i
Sai bohiMi panondang di atashu Laos boan au tu undungundungMi.

B.E No. 225 AI BEASA TUNG HUMOLSO BL. 25
1. Ho, o Tuhan haholongan Ni rohangku sai tongtong
Sai tangihon pangidoan Sai urupi ma au on.
2. Pasupasu ulaonku Tumpak ma sudena i
Sai padenggan ma rohangku Maradophon donganki
3. Sai patiur ma rohangku Mamingkiri basaMi
Sesa ma sude dosangku Paimbaru tondingki
4. Iringiring au Tuhanku Sai tiopi tanganki
Molo tos muse hosangku Abing au tu lambungMi.

B.E No. 226 ADONG DO HASONANGAN BL. 247
1. Adong do hasonangan Di ho parjalang i
Hatop ma ho maporus Tu Tuhan Jesus i
O Jangkon ma Ibana Asa dapotan ho
Adong do hasonangan Antong sai ro ma ho.
2. Adong paradianan Di ho na loja i
Di Tuhan Jesus Kristus Pardenggan basa i
Pareak ma Ibana Ai dipaima ho
Adong paradianan Antong sai ro ma ho.
3. Sai parhaseang tingki Halehetanna i
So tung ho maon mago Binaen ni dosami
Unang sai marhusari Unang tarlalap ho
Adong do hasonangan Antong sai ro ma ho.

B.E. No.227 JESUS NGOLU NI TONDINGKU BL.26
1. Jesus ngolu ni tondingku, Hodo haporusanki
Gok di Ho na ma diringku, ro di nasa langkaki
2. Lam tangkas ma patuduhon, tu au on panghophopMi
Asa i huhalungunhon, hot ma au di lambungMi
3. Jangkon au baen siseanMu Na girgir tu podaMi
Sai surdukkon ma tanganMu Asa tong hutiop i.
4. Tangkup au Jesus Tuhanku Tiop au mansai gomos
Asa unang runsur pathu Sian dalan na tingkos
5. Raphon Ho do au mangalo Dosa dohot hisaphi
Ai sumurut do pangago Anggo Ho di lambungki
6. TondiMi sai tong paian Di au on tinobusMi
Tung patau ma au manean PinarbagabagaMi

B.E No. 228 JESUS HAPOSANKU BL. 246
1. Jesus haposanku Unang au pasombu
Au di hapunjungan Di na so mardongan
Ho tongotong donganku di pardalananku
Jesus haposanku Unang au pasombu
2. Ho sambing Rajangku Ho do oloanku
NaposoM do ahu Di harajaonMu
Sonang ma rohangku Dung tangkas di ahu
Ho sambing Rajangku Jala oloanku
3. Di harajaonMu tigor do uhumMu
Ho ma huihuthon Lao tu hangoluan
Naung torang tarida Sonang do nasida
Di harajaonMu Ala ni uhumMu.
4. Masa asi roha Mida sipardosa
Jesus do manesa Dosa sasudena
Na gogo mudarNa Mamintori hita
Angka asi roha Masa di pardosa.
5. Jesus do Tuhanku Parsingantunganku
Jesus do ojahan Ni haporseaon
Ndada au tahutan Nang di parmaraan
Jesus do Tuhanku Parsigantunganku.

B.E No. 229 HATAMI ALE TUHANKU BL. 181
1. Sai martua do sudena Na so sauduran i
Dohot halak na sumurut Sian na porsea i
Na so olo mangihuthon Tahi ni na jahat i
Na so olo sahundulan Dohot panginsahi i.
2. Sai tongtong lomo rohana Mida pangajaran i
Na nilehon ni Jahowa Gabe sioloan i
I do songon hau na denggan Na di lambung aek hape
Sai ramos tongtong ibana Na so olo malos be.
3. Sai na talu di uhuman Halak sipargeduk i
Jongjong ma di hasangapon Na tigor marroha i
Sipargeduk ndang na tolhas Ro tu hangoluan i
Hamagoan di nasida Sonang do partigor i.

B.E No. 230 HO TONGTONG IHUTHONONKU BL. 182
1. Na malungun do rohangku Mida Jesus Tuhanki
Ai disesa do dosangku Diurasi rohangki
Dibagasan parsahitan Marsigantung au tu Ho
Olo do au mangihuthon PanoguonMi tu Ho.
2. Sai palua ma rohangku Sian na di tano on
Asa Ho hangoluanku Dohot hasonangankon
Beta hita tu Ibana Tabege hataNa i
Holong situtu rohaNa Patut oloanta i.
3. Sangkap nang pangidoanta Dohot na tahirim pe
Ro di angka pingkiranta Di Tuhanta ma sude
Tapararat ma hataNa Tu na so porsea i
Atik saut dope mardame Angka na manjua i.
4. Molo pos roham di Jesus Tinggal di tanganNa i
Sonang ma roham sai tulus Do huhut sinangkapMi
Jadi sai togihononNa Ho muse tu surgo i
Gabe nasa ugasanNa Dohot ho manean i.

B.E No. 231 IDA HINADENGGAN NI BL. 13
1. On ma na di rohangki Jesus i ma Tuhanki
Mago pe portibi on Tu Ibana rohangkon.
2. Jesus do ummaol di au Ai arga ditobus au
Nang musuNa au nian Mago sian nahinan
3. Holan Ho Tuhan tongon Na tau pos ni rohangkon.
Ndang na mago ambolong Na marningot Ho tongtong
4. Tung beha pe au tahe Asal au tu Ho muse
Buat sian rohangki Na hinasogohonMi
5. Amen on ma na sintong Dihalashon rohangkon
Jesus pangondianki Jesus hangoluanki.

B.E. No. 232 JESUS URUPI BL. 116
1. Sian sude parulian na arga Sada huboto hutiop tongtong
Jesus Tuhanku Ho arta na arga Na mangatasi sudena antong
Tangkup Tuhanmu tung tiop hataNa Sai pangasahon ma bagabagaNa.
2. Naeng ho pistar ? Sai dapothon Tuhanmu Nasa na hurang sai boan tusi
Tu pamodaiNa paunduk rohaMu Asa tiur sasude bogasMi
Tangkup Tuhanmu tung tiop hataNa Sai pangasahon ma bagabagaNa.
3. Naeng ho tigor ? Pangasahon Tuhanmu Na tuminggalhon sangapNa sude
Na gabe jolma pasaehon dosamu Holom ma, aithon pangkophopNa i
Tangkup Tuhanmu tung tiop hataNa Sai pangasahon ma bagabagaNa.
4. Naeng ho mangolu salelenglelengna ? Di Tuhan Jesus do jumpang ho i
Nunga torang ditaluhon sibolis Nang hamatean sigomgom sude.
Tangkup Tuhanmu tung tiop hataNa Sai pangasahon ma bagabagaNa.
5. Jesus Tuhanku sai Ho huhaposi Pataridahon tu au holongMi
Pangidoanku tu Ho sai tangihon Basabasahon tu au ngoluMi
Asa di Ho au di harajaonMu Lao patulushon pasauthon hataMu

B.E No. 233 TURENA I MANODO BL.241
1. Turena i manodo Tuhan Jesus Martua na pinarmahanNa i
Ulina i SangkapNa dipatulus Di ganup hita hinophopNa i
Sandok paputus rohaMi Pasahat ma diriM tu Tuhan Jesus i.
2. Sumurug do panogunoguonNa Ummarga sian rumang tano on.
Halaean nasa pangajarionna Dijujur siseanna i tongon
Lam las,lam sabam rohangki Lam hupasolhot au tu Ho, o Tuhanki.
3. Ramoti au Tuhanku sai longkangi Ma sian au tung hatangkangon i
Asi rohaM, datdati, sai torangi Rohangku lao mananda dalanMi
Pangkilalahon ma tu au GogoM, dameM, ngoluM tu dia pe au lao.
4. Ulina i, sai mian di tanganMu Au nang na dokdok niampehonMi
Ai marsihohot ahu di dalanMu Sai tua i di au tumpahonMi
Margogo do panatapMi Mambuat biar mida hamatean i.
5. Tahop pe dosa ro, nang halumlamon Manogu au tu haholomon i
Hutangkup Tuhanki ai ndang tagamon Saut lonong au pasombuonNa i
Jonok Ibana do tongtong Asal di au diida roha na sintong.
6. Sai tong ma au ojak di gomgomanMu Ale Parmahan na sun denggan i
Anggiat tau au tu hasonanganMu Pinaimbaru ni pangkophopMi
Marlas ni roha situtu Au mangihuthon Siparmahan na burju.

BE.No. 234 O JESUS TATAP MA TUSON BL. 32
1. Di rumang ni portibi on Sai tong do lilu rohangkon
Hujujur hatigoranki Hupangasahon burjungki
2. Dung na hutatap Tuhanki Hutanda hahuranganki
Lam tu balgana i antong Ai lam huboto dangolhon.
3. Hurangan au di sasude Sipangasahononhon i
Na so barani rohangkon Manaringoti diringkon.
4. Na gabe tunduk nama au Tu Tuhan Jesus do au lao
Naung mate Ho di Golgata PadoMu au tu Debata.
5. Di tingki ni Tuhanta i Do songgop hatiuron i
Mulai mauas rohangkon Tarsunggul do hot rohangkon
6. Huhalungunhon Hata ni Tuhanku Sipangolu i
Na hubege sai hutohoi Mardongan Tuhan huoloi.
7. Haimbaruon do soluk Tu halumlamon na so tuk
Mardame do huhilala Dibaen Jesusku, Debata.
8. Jesusku hatigoranki Sasada Ho paheanki
Saleleng au di tano on Nang dung marujung ngolungkon.
9. Ndang na tarhirim au disi Saleleng ni lelengna i
Asal ngolungkon situtu Tung Ho, Tuhanku na burju.

B.E. No.235 TUMPALHU NA UMMULI HO BL.235
1. Tumpalhu na ummuli Ho O Jesuski di rohangkon
Sai Ho do tioponku Saleleng au di tano on Ingani ma rohangku
2. Sumurung Ho, O Tuhanki GoarMu hangoluanki
Sai i do haposanku Nang masa pe bernit muse Sai Ho haporusanku
3. Haposan do nang hataMi Ai saut pinarbagaNa i
Nang mate nang mangolu sai sonang au Nang di na dao Ai Ho do Sipangolu
4. O Jesuski dongani au Manang tu dia pe au lao
Sondangi ma rohangku Ho donganki tu surgo i Di ujung ni langkangku

B.E No. 236 JOTJOT DO MARSAK BL. 7
1. Jotjot do marsak i ba binaen i jolma
Na humaliang iba Parroha daging i,
Na humaliang iba Parroha daging i
2. Sai naeng tu hamagoan Sude nasida lao
Ai sian hangoluan Tongtong nasida dao,
Ai sian hangoluan Tongtong nasida dao
3. Dijaga Debatanta Ma hita on disi
Aik naeng ihuhononta Paroha mago i.
Aik naeng ihuhononta Paroha mago i
4. Sipillit hangoluan Tatiru ma tongtong
Huhut tu hasonangan Udur ma hita on,
Huhut tu hasonangan Udur ma hita on
5. Ai sada do Amanta Tuhan Jahowa i
Marria ma rohanta Lao mangihuthon i,
Marria ma rohanta Lao mangihuthon i.
6. Dijaga Debatanta Ma hita on sude
Ditogu ma rohanta Tongtong tu na ture,
Ditogu ma rohanta Tongtong tu na ture

B.E. No. 237 JESUS KRISTUS DO MANOBUS BL 91
1. Jesus Kristus do manobus Hajolmaon sasude
Na niago ni sibolis Di mula na i dope
Jesus Krsitus do Rajanta Sipangolu sasude.
2. Sipujion do Ibana Ai asi rohaNa i
Sioloan do hataNa Ai holong rohaNa i
Di pardosa na tumanda Jea ni rohana be
3. Sahat ma tu Ho tondingku sai ramoti nama au
Ai na susa do diringku Molo au guru di au
Sai tiopi ma tanganku Asa unang mago au.
4. Sai landit, rahis dalanku Musu pe tongtong godang
Sundatanna naeng langkangku Asa unang au sonang
Sai patulus ma sangkaphu Dalananku baen torang.
5. Unang loas au be mago Ai tinobusMi do au
Sai taluhon sipangago Asa tu lambungMu au
Ro di ujung au pamonang Sahat baen tu surgo au.

B.E No. 238 IHUTHON AU SUDE HAMU BL. 93
1. Ihuthon au sude hamu Didok Tuhanta Jesus
Sai soadahon dirimu Hatangku ma patulus
Alai bolongkon ma sude Parulanmu na so ture
2. Sai Au panondang di hamu Di dalan hangoluan
Naeng unang lilu be hamu Dao dohot hamagoan
Au parhitean di hamu Tu hasonangan situtu
3. Hupatuduhon di hamu Sipasidingonmuna
Sude geduk ni rohamu Sipaubaonmuna
Ai naeng ias ma tondimu Di na lao suda bohalmu.
4. Na serep roha do Au on Huhut holong rohangKu
Lambok rohangKu ai tongtong Na lambok do hatangKu
Tongtong hutatap Debata I pe Au on ihuthon ma.
5. Ndang tarpatupa hami i Dipingkir rohamuna
Unang mabiar ala ni Ai Au do donganmuna
TaluhononKu musu i Sai pos ma rohamu disi.
6. Siparhamaol hosana i, I ma agoan hosa
Alai na sumeahon i , I do pangoluhonsa
Na so mamorsan silang i Na so tama di Au ma i.
7. Antong girgir ma hita be Lao mangihuthon Jesus
Dagingta nang tondita pe Talehon ma tu Jesus
Ai na manjua Tuhan i Ndang dapot hasonangan i.

B.E. No.239 BINSAN RO ASI NI ROHA BL. 22
1. Binsan ro asi ni roha Ni Tuhanta i di ho
Alo ma dirim paboa Jora situtu do ho.
2. Sai tundali nasa jea Sai tahopi Debata
Tanda na tutu porsea Ho di Tuhan Debata
3. Ia dalan hangoluan Na gogot tutu do i
Unang ho marhamaluan Tagam nasa musumi
4. Anggo dalan namagoan Na lambas tutu do i
Tung tu api do diboan Na disi dirina i.
5. Sai papos roham mangalo Alo dosami gogo
Asa unang ho na talu Unang na sumurut ho
6. Angkup ni sai martangiang Asa ganda gogomi
Jala sai tongtong ho sirang Sian angka musumi.
7. Unang sai matamatahon Arta na di tano on
Jaga ma roham salahon Roha ni portibi on
8. Hisapmi tongtong pompomi Sai patunduk dagingmi
Asa unang diintopi Dosa i palitomi
9. Sai momosi ma luhutna Naung hinamonangkonmi
Unang loas be malua Ai mansai jorbut do i.
10. Ia dung dapotan uli Ho sai unang tois roham
Ai ndang sahat dope muli Tondimi tu banuam.
11. Sasude na burju roha Mangihuthon Jesus i
Sai dialo do musuna Paima tos hosana i
12. Dirimu do musumuna Dohot dipangago i
Ia hangoluanmuna I ma Tuhan Jesus i.

B.E No. 240 NGOT MA HO DIJOU SOARA BL. 222
1. O hamuna na porsea Sai tong hamu mangalo jea Utian ni pangago i
Hata ni Debatamuna Ma baen hamu sinjatamuna Ndang talu be hamu disi.
Bisuk pe musu i Ditanda rohami Jou ma Jesus
Sai monang do baenonna ho Alai musunta talu do.
2. Sai paias rohamuna Huhut sai alo hisapmuna Ai halak Krsiten do hamu
Sai papos ma rohamuna Di Tuhan Jesus Rajamuna Ai urupanNa do hamu
Naeng suda pe gogom Sai tatap sambulom Na di ginjang
Sonang disi tondinta i Dung sahat hita ro disi.
3. Ale Jesus pargogoi Ma nasa jolma sioloi Hatam di hasiangan on
Paimbaru rohanami Huhut papir ma tondinami Ai na gale do hami on
Tu rohanami be Pasaor ma TondiMi Na badia
Sai burju be di Ho sude Mangolu manang mate pe.

B.E. No. 241 ASAL MA IBANA BL.61
1. Asal ma Ibana Sai tongtong di au
Jala denggan ni basaNa Unang lupa sian au
Ndang be anggo sala Holan las ni roha huhilala
2. Asal ma Ibana Sai tong artangki
Tano on ro di artana Ndang be maol di rohangki
Burju do rohangku Mangihuthon Jesus i Tuhanku
3. Asal ma Ibana Hangoluanki
Gabe sude siluana Songon na hutean i
Ro pe sorimago Sai hutatap Jesus na di surgo

B.E No. 242 RAHIS JALA MAOL BL. 76
1. Rahis jala maol tutu Dalan tu banuaginjang
Na martua situtu Angka na disi mardalan
Mangihuthon Jesus i Sahat tu ujungna i.
2. Upa na sumurung i Dapot na burju marroha
Maralohon dosa i Dohot hisap ni dagingna
Na tongtong mangkirim di Sanggul hamonangan i
3. Na sap mudar nahinan Gantung di hau pinarsilang
Diomohon do hian Upa na marhasurungan
Ai didok do ujui “Nunga sun ulaonki”
4. Ale Jesus togu ma Hami angka paranganMu
Asa tarpareak ma Hatiuron di lambungMu
Dung pe tanggal daging i Dapot hasonangan i.
5. Dongan pir ma tondimu Maralohon hisapmuna
Tatap Jesus naung tutu Manggarari dosamuna
Ai marhite Jesus i Sahat hamonangan i.

BE No. 243 SAI BERENGI PARTONGOLAN BL.169
1. Sai berengi partonggolan na di ginjang i
Idaonmu hamonangan Ni Tuhanta i
“Debata do dongannami “ I ma tajou be Tumpal hangoluan i do Jaloonta be.
“Debata do dongannami “ I ma tajou be Tumpal hangoluan i do Jaloonta be.
2 Ida angka ulubalang Ni sibolis ro
Naung torop tinaluhonna I pe dungo ho
“Debata do dongannami “ I ma tajou be Tumpal hangoluan i do Jaloonta be.
“Debata do dongannami “ I ma tajou be Tumpal hangoluan i do Jaloonta be.
3. Tatap ma hau pinarsilang Ni Tuhanta i
Ndang tarbaen hamu so monang Mangasahon i
“Debata do dongannami “ I ma tajou be Tumpal hangoluan i do Jaloonta be.
“Debata do dongannami “ I ma tajou be Tumpal hangoluan i do Jaloonta be.
4. “Burju tole”, ninna Jesus. “Ai tibu Au ro”
Ale Tuhan rohanami Sai hibul tu Ho
“Debata do dongannami “ I ma tajou be Tumpal hangoluan i do Jaloonta be.
“Debata do dongannami “ I ma tajou be Tumpal hangoluan i do Jaloonta be.