BUKU ENDE NO.308 SD 370

B.E No. 308 JUMOLO MA HUPUJI BL. 28

1. Jumolo ma hupuji Ho, O Tuhan Debatangku
Di ari na imbaru ro Paboa las rohangku
2. Mangaramoti hosangkon Soadadong gogongku
Sonang do au saborngin on Binaen ni panjagamu.
3. Ho do manongos jolma i Dilehon Ho ngolungku
Ho do mangudut hosangki Na borngin i, Tuhanku
4. Hupuji hagogoonMi Dohot haburjuonmu
Dibaen dung sonang borngin i las ma nuaeng rohangku
5. Antong pasonggop ma tu au PasupasuM Tuhanku
Sadari on urupi au Mambaen na pinatikMu.
6. Pangolu au sadari on Ho do pangkirimanku
Padao ma jea i tongtong Sai sesa ma dosangku.
7. Papos rohangku mida Ho Gok holong baen rohangku
Pistar ma au huhut gogo mambaen sibahenonku
8. Sai luluanku na burju Di au harajaonMu
Porman nang tigor situtu Ma baen pangalahongku.
9. Lao mangurupi dongan i Paringgas ma rohangku
Manaek pangabahanna i Las ma disi rohangku.
10. Marroha na bonar ma au Tongtong di adopanMu
Marlasniroha ma au lao Dung ro panjouM Tuhanku.


B.E No. 309 RAPHON TUHAN JESUS I BL. 164

1. Raphon Tuhan Jesus i Pungka ulaonmu
Ingkon tu Ibana i Parguruhononmu Baen Ibana donganmi
Hehe dohot modom Dege ma bogasNa i Rohami pahohom.
2. Ganup sogot ingkon do Jesus jouhononmu
Asa urupanNa ho Di siulaonmu Ai arian borngin pe
Naeng ho dongananNa Dosami pe sasude Naeng taluhononNa.
3. Molo Jesus donganmi Ndang tarbaen ho mago
Nang bisuk sibolis i Jesus do gumogo Asal dihaposi ho
Jesus i Tuhanmu Ingkon sai maporus do Na niarsakkonmu.
4. Hupasahat ma antong Saluhut langkangku
Tu Tuhanku, na tongtong Mian di rohangku Manang aha pe hubaen
Ho hupangasahon Ale Tuhan Tulus baen Saluhutna, Amen.


B.E No. 310 TAPUJI MA TUHANTA BL. 12

1. Tapuji ma Tuhanta Dibaen dengganbasaNa
I ma sipanganonta Naung sidung di jolonta.
2. Pamatang nang tondinta Dilehon do tu hita
Ndang dung holit rohaNa Pahot na nilehonNa.
3. Dagingta diparmudu Tondinta pe mangolu
Ianggo di rohana Nang pe godang marana
4. Ai sahit ni rohanta I ma tutu dosanta
Naung mate do tondinta Binahen ni sahitta.
5. Naung ro do Sipangubung Parngolu na sumurung
Tuhanta Jesus Kristus Tondinta i ditobus.
6. Naung sesa do dosanta Rade hangoluanta
Gok ni parjambaranta Disurgo jaloonta
7. O Jesus Tuhannami Tusi pasahat hami
Na metmet na magodang Togihon tu na sonang.


B.E No.311 SAI PALINGGAS HO BL. 190

1. Sai parmudumudu hami Sai apuli rohanami
Pasupasu sipanganon Asa gabe hatoguon
Jala gabe hangoluan Di pamatang hagaleon
Paima sogot sahat hami Tu lambungMu Amanami.


B.E No. 312 PUJI JAHOWA NA SANGAP BL. 56

1. Puji o jolma ma bona ni hangoluanmu
Na marmuduhon tongtong nang tondim nang dagingmu
Puji tutu Sai haholongi burju Na patupahon sonangmu.
2. Nunga dilehon Ho Tuhan sipanganonnami
Tau hasangapon di Ho ma nuaeng hubaen hami
Pamatang i Ro di gogona sude Tanda na las rohanami
3. O Sipangolu sai tatap huhut tondinami
Jala pabosur ma i di pardalanannami Tu surgo i
Jesus palungun ma i Tongtong di Ho Tuhnannami
4. Sai parmahani ma hami na di halongonan
Jala patau tu haroan di banuaginjang
Togu tongtong Hami na loja dison Sahat tu paradianan.


B.E No. 313 O JESUS TATA MA TUSON BL. 32

1. Hupuji Ho, o Tuhanki Dibahen dengganbasaMi
Ai disarihon Ho tongtong Bohalhu na di tano on.
2. Parade ma di au muse Parguna tu tondingku pe
HataM na sun badia i Pasaorhon ma tu rohangki.
3. Pabosur dohot tondingki Togihon au tu surgo i
Disi ma Ho pujionki Saleleng ni lelengna i.


B.E No.314 NA SALPU DO ARIAN I; HUPUJI BL. 35

1. Na salpu do arian i Hupuji Ho Debatangki
Ai sahat di bodari on Tongtong basaM di hami on.
2. O Tuhan sai asi rohaM. Tambai ma denggan ni basaM
Sai sesa nasa dosangki O Jesus dohot mudarMi.
3. Ramoti au saborngin on Huhut pasonang rohangkon
Sai dokkon ma suruanMi Padaohon nasa mara i.
4. Dung na tarsunggul au muse Manogot sai paingot pe
Mamujimuji goarMi Nang pararathon sangapMi.


B. E No. 315 Songon ende No. 314 BL. 35

1. Na salpu do arian i Soluk ma ro na holom i
O Jesus nang saborngin on Sondangi hami on tongtong
2. Na jorbut, mara, rugi pe Diambat Ho do i sude
Ipe pinuji goarMi Dibahen dengganbasaMi.
3. Pambaenannami sasude Na maralohon Ho hape
Sai sesa ma luhutna i Ai marsak hami ala ni.
4. Urasi baen ias muse Ma tondi dohot daging pe
Ai naeng sonang saborngin on Do rohanami sai tongtong
5. Sai dokkon ma suruanMi Mangambat jea saude
Nang saluhut di tano on Na tau mangago hami on.


B. E No. 316 SAI MARLAS NI ROHA HITA BL. 175

1. Nunga lao muse sadari Jesus sian bohalhon
Sai paingot au saonari Manang burju rohangkon
Jala tudu ma sude Na hubaen na so ture
Asa sae annon dosangku Jala sonang ma rohangku.
2. Lan do dapot pambaenanku Sogo ni rohaM hape.
Ai gok dosa do rohangku Sala do hatangku pe
Ganup tongkin ma tutu Ndang marningot au burju
Di sude na pinatikMu Ala ni godang dosangku.
3. Sai asi rohaM Tuhanku Sai palambas rohaMi
Ai dokdok tutu rohangku Sesa nasa dosangki
Patuduhon ma basaM Dohot holong ni rohaM
Asa ganda ma ringgashu Mangoloi sude patikMu.
4. Na badia baen rohangku Dohot di na modom au
BasaMi baen bulusanku Dokkon na manjaga au
Sai intopi api i Jala jaga bagas i
Asa unang tangis hami Dung muse tarsunggul hami
5. Sai togangi nasa jolma Na mambaen na jahat i
Unang ma laluhononNa Tahi ni rohaNa i
Dompak hami, anakMi Angka haholonganMi
Sai tamparhon sian hami Nasa na mangago hami
6. Ndang na olo nok, o Tuhan MataMi nang borngin i
Jesus Ho do Siparmahan Na dumenggan roha i
Borngin nang arian pe Diramoti Ho sude
Ala ni ingani hami asa sonang modom hami
7. Sai hipas pahehe hami Di tingkina na ture
Asa hudapothon hami Siulaonnami be
Manang naeng alaponMi Borngin on au Tuhanki
Sai na sahat tu tanganMu Do pamatang nang tondingku.

B.E No. 317 HAMU SALUHUT HALAK BL. 65
1. Lao modom do luhutna Nuaeng sude na loja
Sandok portibi on Ianggo ho tondingku
Pasangap ma Tuhanmu Na sumarihon ho tongtong
2. Ale mata ni ari Tu dia ho saonnari
Dilele borngin ho ? Holom pe saluhutna
Nuaeng diida mata Di Debatangku tiur do.
3. Nang so torang be ari Adong do sada nari
Na manondangi au Panondang i Jesusku
Na mian di rohangku Ndang be tadingkononNa au.
4. Naung salpu do arian Tiur do angka bintang
Di hajangkajang i Suman tusi ma ahu
Di lambung ni Tuhanku Dung hutadingkon tano i.
5. Lao modom au saonari Abithu huosari
Huingot ma disi Ngolungku na lao salpu
Nang ulos jaloonku Naung diparade Jesuski.
6. Paherbang ma tanganMu Jesus, las ni rohangku
Ondingi anakMon Ro begu naeng mamolgak
SuruanMi mangonggak Ndang jadi jamaonmu on.
7. Dohot hamu donganku Sude haholonganku
Dao sian mara i Dipaderem Debata
Hamu dohot sinjata Ditiop suruanNa i.

B.E No.318 . NUNGA LOJA DANGINGKON BL. 14
1. Nunga loja dagingkon Naeng ma pitpit matangkon
O Tuhanku mataMi Dungo di podomanki.
2. Sesa jolo sasude Na hubaen na so ture
Ai luhut na sala i Dipature Jesuski
3. Dohot angka donganki Sahat ma tu tanganmi
Isi ni portibi on Jaga ma saborngin on
4. Angka na mardangol i Dohot na marsahit i
Angkup ni na tangis pe Sai apuli ma sude.

B.E No. 319 SAI TIOP MA TANGANKU BL. 150
1. Tung sonang modom ahu Saborngin on So jolo Ho Tuhanku Ingotonkon ?
Na mampar do rohangku Narian i Tu Ho ma luluanku Na sonang i.
2. Sai sesa nasa dosa Ale Amang Ho na marholong roha Asi rohaM
Paias ma rohangku Na ramun i Pagirgir au mamuji Ho Tuhanki
3. Urupi au maniru PanesaMi Nang pe pangkaholongi Ni rohaMi
Na sonang ma au modom Saborngin on Ai dame do maringan Di rohangkon.

B.E No. 320 MAPORUS DO ARIAN BL. 211
1. Maporus do arian Ma salpu hatiuron Di soluk haholomon
Mambaen paradianan Di nasa jolma i Holom do di matangku
Tu Ho do lao rohangku Sitompa parsorinan
Ni ari dohot borngin Mamuji goarMi.
2. Girgir ma ho tondingku Mamuji Debatamu Ai na so habilangan
Do saluhut na denggan BinaenNa i tu Ho Satongkin pe ndang salpu
So sahat tu tanganMu Godang dengganbasaNa
Nang asi ni rohaNa Na pangoluhon ho.
3. Ai songon siparmahan Manjaga di adaran Dorbia asa dapot
Saluhut i na ringkot Hangoluanna i Laos songon i Tuhanku
Dilehon do bohalhu Tongtong do jinagaNa
Au songon dorbianNa Dibaheni basaNa i.
4. Ndang au tinadingkonNa Hape pinatikkonNa
Jotjot nilaosanku Sai lilu do rohangku Mambahen dosa i
Asi rohaM Amangku Paombun ma rimasMu Tama do au toruan
Alai na huarsakkon Sude pambaenanki
5. Tangihon ma hatangku Sai sesa ma dosangku
Ai mudar ni AnakMu I do paridianku Na paiashon au
Sai dokkon suruanMu Marsaro di lambungku
Ho ma tongtong donganku Di na lao nok matangku Nang di na hehe au.
6. I ma na hinaposan Ni rohangkon, o Tuhan
Umbahen sonang rohangku Tumopot podomanku
So humasusa au Ai ndang habiaranku Pangago ni musungku
Dibaen habongkabongmu Na mangkuphupi au Mangaramoti au.
7. Na modom manang dungo Na hundul manang laho
Di tanganMi do ahu Ho do hangoluanku Sintong do hata i
Ai Ho do pangondingan Arian dohot borngin Partanobatoanku
Na so tadingkononku Ai sonang au disi.

B.E No. 321 MARUJUNG DO SADARI ON BL. 174
1. Marujung do sadari on Dibaen panondang bolon
Na maradian tano on I pe sai taendehon Ma Debatanta i
Parasi roha i Tasunggul ma rohanta be Mamuji Jesus ma sude.
2. Sai marsinondang bintang i Nang bulan na di ginjang
Na patiurhon langit i Alai andul tumorang Do marsinondang di
Bagasan rohangki Jesusku hasangaponki Artangku pangondinganki.
3. Sai modom do bornginna i Nang jolma nang pinahan
Alai dungo di ginjang i Na so marhalojaan Ndang olo nok tutu
O Jesus mataMu I pe sai ingkon dungo do Rohangku mandongani Ho
4. Unang ma lea rohaMi Diendengkon o Tuhan
Ndang olo sonang rohangki So jolo i huboan Ai i do na adong
Di au na pogos on Ipe sai jalo nama i O Jesus alealengki.
5. Sai Ho ma mandongani au Saleleng nok matangku
Pangondinganku tatap au Ramoti ma tondingku Ndang na mabiar au
Nang pola mate au Ai na lao modom dohot Ho Marlasni roha hehe do.
6. Pasurut ma sude hamu Pardibanuatoru
Ndang be au guru di hamu Ai Jesus do Rajangku
Surusuruan i Manjaga jabungki Tung hahuaonmuna au Nasida do manjaga au.
7. Antong, sai sonang modom au O Jesus di tanganMu
Peak di asiMi do au BasaM haporusanku Ho pangondinganki
Huingot hataMi Dipasingothon TondiMi Ma i tongtong tu rohangki.
8. Antong, ale pamatangki Sai sonang ma ho modom
Pitpit hubahen matangki I do hinalomohon Ni Tuhan Debata
Antong huingot ma Ho Jesus Siparmahan au Saborngin on ramoti au.

B.E No. 322 O JESUS SIPANGOLU AU BL. 36
1. O Jesus Sipangolu au Tu podomanku naeng au lao
Naeng maradian dagingki Ho ma mangkinsu pintu i.
Naeng maradian dagingki Ho ma mangkinsu pintu i.
2. Sai sesa dosangki sude Pasonang au na modom pe
Saborngin on ramoti au SuruanMi manjaga au
Saborngin on ramoti au SuruanMi manjaga au
3. Sude na tau mangago au Aek manang api pe padao
Nang hamatean na tompu Pasonang ahu situtu
Nang hamatean na tompu Pasonang ahu situtu
4. Laos songon i ma donganki Ramoti ma luhutna i
Pahehe au muse hipas Asa hupuji Ho ringgas.
Pahehe au muse hipas Asa hupuji Ho ringgas.

B.E No.323 SONANG DO ROHANGKU BL. 204
1. Siparmahan bolon Na so olo modom Tatap ma au on
BasaMi o Tuhan Do mangaramothon Au sadari on
Borngin pe Ho ma muse Na manjaga humaliang Ahu asa sonang
2. Ho ma manamparhon Nasa parmaraan Dohot basaMi
Sesa ma dosangku Ias ni rohangku Hasonanganki
AnakMi naung mate i, I do na padao dosangku Ipe las rohangku.
3. Dohot ma donganku Hinaholonganku Sahat ma tu Ho
Sai tong diranapi MataMi ma hami asa sonang do
Ho tongtong di lambungkon Jala au di Ho, o Tuhan I do hasonangan
4. Nasa parmaraan Dohot hasusaan Sai padao sude
Ale Amanami Sai ondingi hami Asa sonang be
Sai orai pangago i Unang hami diarsahi Jala disusai.
5. Aik beha ajalhu Suda ni bohalhu Ro saborngin on ?
Molo i, Tuhanku RohaMi di ahu Alap ma au on
Asal lao tu surgo au Pasahaton ni Jesusku Sonang do rohangku
6. Pos nuaeng rohangku Pitpit ma matangku Mangasahon Ho
Sahat tu tanganMu Daging nang tondingku RamotanMu do
HataMi do mandok i Dung i, molo ngot manogot Ho muse hutopot.

B.E No. 324 HAMU SALUHUT HALAK BL. 65
1. Na ro muse na holom Jumolo asa modom Hupuji goarMi
O Jesus tatap ahu Sai pasupasu ahu Huhut patiur rohangki
2. Nuaeng pasahatonku Tu ai ni rohaMu Dagingku, tondi pe
Ulaon ni pamatang Pambaenan haholoman Padao ma sian au sude
3. Ho do mangkaholongi Ho do mangkaliangi Huhut mamio au
Ho do palas rohangku Balga ma etongonku Roham na denggan i di au.
4. Sai masipaboaan Arian dohot borngin Mandok mardalan au
Tumopot hasonangan Na di banuaginjang Tusi o Jesus taiti au.

BE No 325 BODARI ON BL. 58
1. Bodari on Na dungo do au on Sai naeng pujionki Ho, Debatangku
Sai pargogoi Ma au, lao mangoloi Ho sian nasa ringgas ni rohangku.
2. Sonangna i Mamingkir basaMi Pahohom rohangki di adopanMu
Pabali ma O Tuhan Debata Sude na tau manggaori pingkiranku.
3. O Jesuski Hupuji goarMi Dibaen tinoguMi au tu lambungMu
Aut na tongtong Burju ma rohangkon Pasauthon hataMi ale Tuhanku
4. Parbasa i Lambas do rohaMi Manesa dosangki tinopotanku
Sai diapoi Huhut dipargogoi Ho rohangkon muse di tangiangku
5. Ho ma tongtong Nampuna rohangkon Sai taiti ma au on pahot langkangku
Andigan pe Badia au muse Nang sun denggan dope Ho pujionku ?
6. Alai basaM Nang asi ni rohaM Dibaen na pinungkaM tangkas marujung
Pos rohangki Sai patoguonMi Do au, ai goarMi tongtong hujujung.
7. Ho artangki Na pinarsinta ni Rohangku na las i dibaen holongMu
Pagalak ma Di au, o Debata Gurasa i Ho naeng haholonganku
8. Ojahanki Di na humordit i Sude di tano i Ho, o Tuhanku
Nang songgop pe Na hansit i muse Ho ma halungunhonon ni rohangku
9. Lam ganda ma Di Ho, o Debata Hamuliaon dohot hasangapon
Di orbuk on Muse ma di joloM Dung binongotanku banuaginjang.

B.E No. 326 IA LOJA AU BL. 114
1. Ia loja au dibaen ulaon Las rohangku bodarina i
Ai disi tarbaen au maradian Sonang huhilala rohangki
Lam beha ma hasonangan i Molo bongot hita sogot lao tu surgo i
2. Ai adong dope paradianan Di naposo ni Tuhanta i
Dung malua sian parungkilon Dompak dosa dohot setan i
Pasonangon ni Tuhanta i Ma naposo na manjalo upa burju i.
3. Surgo na tongtong marhasonangan Pansohotan ni sitaonon i
Naeng di Ho au muse maringanan Asa au diapul Tuhanki
Sai asi rohaM o Jesuski Sai pabongot ahu sogot tu ingananMi.

BE.No. 327 AUT NA SARIBU HALI GANDA BL. 103
1. Marujung do nuaeng saminggu Alai basaM ndang songon i
Ai songon na niusehonMu PasupasuM tu rohangki
Laos songon i tu jolo on Naeng tongosonMu i tongtong.
2. Hupuji Ho, o Debatangku Mauliate au di Ho
Dibaen sude na nilehonMu Di au huhut huboto do
Las do rohaM di endengki Marhitehite Jesus i.
3. Tutu adong do na hutaon Saminggu on ditongos Ho
Ditumpak Ho do au manaon Ipe godang na denggan do
Dihorhon na hutaon i Antong hupuji goarMi.
4. Nuaeng adong pangidoanku Na ringkot situtu di au
Sai unang ingot be dosangku Asi rohaM urasi au
Marhitehite mudar ni Naung manggarari utangki.
5. Ndang ubaonMu na nidokMu Sai hot ma bagabagaMi
Pardosa do pangoluonMu Ianggo marsak roha ni
Huhut diboan dosa i Tu Jesus Kristus AnakMi.
6. I ma tiniop ni rohangku Di haporseaonna i
Umbahen na las nuaeng rohangku Lao paujungkon minggu i
Ai nunga sonang rohangki Dibaen pangkirimonna i.
7. Alai naung ganda do umurhu Dibahen i jumonok do
Hatiha ni panadingkonku Di tano on tumopot Ho
Hobas hian baen tondingki Tumopot hasonangan i.
8. Ia tarsunggul au manogot Di Minggu na imbaru i
Marlasniroha ma hutopot BagasMu parmingguan i
Ai jaloonku ma disi HataM na sun badia i.
9. Antong nuaeng hian hupuji Na naeng lehononMi dope
Tarida do pangkaholongi Ni rohaMi di au muse
Ditogu Ho tu banuaM Au sian tahi ni rohaM.

B.E No. 328 NAENG SALPU ARI MINGGU BL. 66
1. Naeng salpu ari Minggu Didaoni Ho siholhu
Tu Ho, o Tuhanki Au do niajaranMu
Huhut binutonganMu Marhitehite hataMi.
2. Ho do na maringanan Di rohangkon, o Tuhan
Tung sonang au nuaeng Tumopot podomanku
Ai sesa do dosangku BasaM bulusanki hubaen
3. Ai sahit ni tondingku Do malum, o Tuhanku
Dibaen joroM do au Na tiur do rohangku
Ai nunga binuatMu Sude na holom sian au.
4. Sai ramotanMu ahu Sai sondanganMu ahu
Nang di na holom i Paima ro arian
Na so marpansohotan Saleleng ni lelengna i.
5. Na sonang do rohangku Ai surusuruanMu
Do mangingani au Huida di rohangku
HinauliM Tuhanku Aut sahat i tibu tu au.

B.E No. 329 JESUS HINAPOSAN NI BL. 75
1. Jesus hinaposan ni Rohangkon do na mangolu
I huboto ala ni Hupasabam ma rohangku
Nang targogot rohangki Mamingkiri ajalhi.
2. Jesus, Sipangolu au Do mangolu, o tondingku
Ho pe ingkon sogot lao Tu inganan ni Tuhanmu
Tung tartading baenon ni ulu i ruasna i ?
3. Domu au tu Jesuski Ala ni pangkirimonku
Ai haporseaonki Do marojak di Tuhanku
Na so tupa sirang be Sian Jesus au muse
4. Sibuk ahu, ala ni Ingkon gabe orbuk ahu
Atik pe huboto i Ndada olo ganggu ahu
Ingkon suang hosangki Dipasuang Jesus i.
5. Na gale di tano on Sai margogo do i sogot
Di na lea i dison Hasangapon i do dapot
Partondion do muse Dagingniba on hape.
6. I pe haringkothon ma Tumundalhon hisaphisap
Sai hombari Debata Roha daging i ma gotap
Sai rapethon rohaMi Tu na naeng topotonmi.

B.E No. 330 DI TANO ON MARDAGANG AU BL. 192
1. Di tano on mardagang au Sambuloniba di na dao
I ma Jerusalem na uli Debata paojakkon i
Di mudar ni anakNa i Tusi ma lao tondingku muli
Di tano on mardagang au Sambuloniba di na dao.
2. Pardalanniba doras do Laos songon i ajalhu ro
Naung salpu i Ndang haulahan Silu do suda bohalhon
Urasi Jesus rohangkon Huhut patonggor parnidaan
Manggotap roha tano i Mareak na di surgo i.
3. Matua maol do dalan i Atik pe lao tu surgo i
Lan do jagaon ni rohangku Gogot do dalan musu i
Mangambat au unang tusi Jotjot do na tartuktuk pathu
Huhut lungun do dalan i jut situtu do rohangki
4. Jotjot hurangan rohangki Di sondang ni Tuhanta i
Na sian asi ni rohaNa Disi marparmaraan au
Adian pe so dapot au Alai na lupa do susana
Di na marningot tondingki Di surgo sitopoton i.
5. O Jesus Debata hian Na gabe jolma nahinan
Pardagang situtu donganku Nuaeng ma sian hataMi
Tu au tuduhon bogasMi Lam jonok baen tu Ho rohangku
Tongtong do habang ngolungkon Silu ma topot AnakMon.
6 Gomgomi daging, tondingki Marhitehite Tondimi
Patongtong rohangkon manahan Jotjot do tarsulandit au
Pahehe au togihon au Ondingi au di parmaraan
Sondangi dohot asiMi Rohangku di na holom i.
7. Tung naeng mandate tondingki Dibahen siholNa Jesuski
Tu Ho pasabam ma rohangku Disi mapitpit matangkon
Tu Ho ma alap anakMon Tu pansohotan ni arsakku
Disi ma au di lambungMi PedanMu jala donganMi.
8. Pardagang au di tano on Na buro di portibi on
Di surgo do alealengku Disi ma dohot dongangki
Naeng pujionku goarMi Paboa holong ni rohangku
O Jesus Sipalua au Tibu ma ro masihol au.

B.E No. 331 PAIAN MA DI HAMI BL. 6
1. Sai Kristus do ngolungku Lao mate untung do
Tusi do lao rohangku Tusi masihol do.
2. Las situtu rohangku Manopot Jesuski
Di lambung ni Tuhanku Sai mian tondingki.
3. Naung saut do ditaluhon Sude na jorbut i
MudarNa padomuhon Au dohot Ama i.
4. Di na homur matangku Sai ponjot hosangki
Ndang puas be hatangku Sai ro ma Ho disi.
5. Dung mampar pingkiranku Sobokkon lampu i
Na sai humillohillo Na so marmiak be.
6. Disi ale Tuhanku Padomu anakMon
Huhut tu ingananMu Togihon tondingkon.
7. Sai loas ma au lohot Di Ho, o Jesuski
Paian ma au sogot Tongtong di surgoMi
8. Disi ma pujionku Ho dohot Ama i
Nang Tondi Parbadia Di hasonangan i.

B.E No. 332 BINOTO JONOK NI ADAMHU BL. 111
1. Binoto jonok ni adamhu ? Aringku lao bodari ro
Aik sura ro tompu ponjothu Parpudi i binoto do ?
Jesus, Jesus marhite mudarMi Pasonang hamamatengki.
2. Jotjot asing di potang ari Asa di manogotna i
Ai tagan au dison mansari Tongtong tagamon ajalhi
Jesus, Jesus marhite mudarMi Pasonang hamamatengki.
3. Ajari au, ale Tuhanku Mamingkir hamamatengki
Huhut paingot ma rohangku Tongtong di hamamateMi
Jesus, Jesus marhite mudarMi Pasonang hamamatengki.
4. Urupi ahu, paturehon Langkangku na di tano on
Paingot ma au mangalehon Tu Ho Tuhanku rohangkon.
Jesus, Jesus marhite mudarMi Pasonang hamamatengki.
5. Baen lam tonggi di ahu surgo Lam paet huhut portibi on
Sai naeng tu ginjang au manggogo Saleleng au di tano on
Jesus, Jesus marhite mudarMi Pasonang hamamatengki.
6. Huphupi ma sude dosangku O Jesus dohot mudarMi
I do hubaen parulosonku Manopot hasonangan i
Jesus, Jesus marhite mudarMi Pasonang hamamatengki.
7. Tu Ho, o Jesus au palohot Rohangku lonong di rohaM
Manang di dia Ho, au dohot Dison pe nang di banuaM
Jesus, Jesus marhite mudarMi Pasonang hamamatengki.
8. Antong nang ro pe hamatean Marsogot nang sadari on
Ndang habiaran be udean Ai Jesus do di au tongtong
Jesus, Jesus marhite mudarMi Pasonang hamamatengki.
9. Ipe na sonang au mangolu Ndang marsak au lao mate pe
Huboto do sai dipangolu Ho, au di hamamataengki
Jesus, Jesus marhite mudarMi Pasonang hamamatengki.

B.E No. 333 JESUS HINAPOSAN NI BL. 75
1. Sai banuaginjang do Situjuon ni rohanta
Holan paisolat do Hita di banuatonga
Pardagangan tano i Surgo do sambulo i.
2. O Tondingku tuju ma Surgo i haroroanmu
Tano on tundalhon ma Na so tau parmiananmu
Surgo do tinuju ni Na torang marroha i.
3. Jesus do mandok tu au: “Sai tu ginjang ma tujui
Asa unang ho mandao Sian sambulom adui”
Ia tong hingot i Sahat au muse tusi.
4. Sai tu ginjang au, manat Do tinatap ni rohangku
Parjambaranki na hot Na di lambung ni Amangku
Nang tiur pe bintang i Marsinondangan do i.
5. Sai tu surgo ma au lao Hitengki ma hamatean
Jadi sai malua au Sian nasa hasusaan
Jesus pajolohon au Ipe las rohangku lao.
6. Holan surgo i nama Siringkotan ni tondingku
Asa gotaponku ma Roharoha ni dagingku
Surgo do tujuanki Paima sahat au tusi.

B.E. No. No: 334 NASA JOLMA INGKON MATE BL. 186
1. Nasa jolma ingkon mate Ingkon mago sibuk i
Na mangolu ingkon mate Asa tung denggan muse
Daging on do gabe bangke jala ingkon do malangke
Asa sogot bangkit i Tu hasangaponna i
2. Ipe ndang be juaonku Roha ni Debatangki
Lehononku do hosangku Ndang be marsak au disi
Ai di bugang ni Jesusku Dapot au hangoluanku
Ala hamamate ni Do tarapul rohangki.
3. Jesus Kristus nunga mate Ala ni mangolu au
Singkop tua diparade I pe las rohangku lao
Manadingkon pardagangan Mandapothon hasonangan
Mandapothon Jesuski Ai malungun au tusi.
4. Sonang ma disi rohangku Molo jongjong au disi
Dohot sasude donganku Na marhasangapon i
Dohot Serapim silehon Sangap nang hamuliaon
Di niendehonNa i Sangap di Tuhanta i.
5. Dohot do disi maringan Na badia i sude
Ompu dohot Panurirang Nang sude Apostel pe
Ai marriburibu taonna Lao tumopot ingananna
Angka na badia i Pasangaphon Tuhan i.
6. O Jerusalem na uli Tiur ni panondangMi
Sonang dohot au maruli Tumangihon endemi
On pe timbul las ni roha On pe binsar nasa tua
On ma ari i tahe Na so olo salpu be.
7. Ai idaon ni matangku Hasangapon i sude
Hatigoran do uloshu Na pasangap au muse
Pinarsanggul hamonangan Jongjong au di hasonangan
Maradophon Debata Sai tongtong, Haleluya

B.E. No. No.335 LOAS AU, ASA LAO BL.50
1. Loas au asa lao Tu Jesusku tu na dao Ai malungun do rohangku
Mandapothon Debatangku Asa di lambungNa au Asa di lambungNa au
2. Jesuski, Sondang i Sitorusi ombun i O andigan ro tingkingku
Asa borhat ma tondingku Lao marnida bohiMi?, Lao marnida bohiMi?
3. Sungkot ni denggan ni Ende ni suruan i Aut marhabongkabong ahu
Tongkin on dope au laho Tu banuaginjang i, Tu banuaginjang i
4. Sonangmi tondingki Molo sahat ho tusi O Jahowa Debatangku
Ndang dodoan ni rohangku Las ni roha i disi Las ni roha i disi

B.E. No. No. 336 SONANG MA MODOM BL. 45
1. Sonang ma modom ho na martua i Na maradian sian ulaon i
Na niulamu di hajolmaon Jala na mangihut ho tu surgo
2. Naung niapusan do iluilumi Sian matamu dibaen Tuhanta i
Tangis najolo mangusung boni Las do rohamu nuaeng manggotil
3. Molo soara ni Tuhan Jesus i Na manorusi sude tanoman i
Ro manungguli angka naung mate Hehe nasida marhasangapon
4. Hamuliaon di Ho, o Debata Ala pambaenMu di hami on sude
Mate do hami ala ni dosa Mangolu hami dibaen AnakMu.

B.E No. 337 SONANG BL. 79
1. Molo giot ho tu ginjang Tu na sonang Haru pareak ma i
Tuhan Jesus do mangungkap Di patalak Bahal na di ginjang i.
2. Loas ma au mandapothon Hatiuron Di banuaginjang i
Angkupanku ma suruan mangendehon sangap ni Tuhanta i.
3. Jesus, na parjolo laho au ma togu Tu paradianan ni
Birubiru tinobusMu BinoanMu sian pardangolan i.
4. Ndang be olo au lohoton Ni ugasan Angka na di tano i
Mian au di halongonan ? Ndang tagamon Lao ma au tu surgo i.
5. Lehon ma haporseaon Hagogoon Na manorus sasude
Ai malungun do rohangku Di Tuhanku Nang di ingananna pe.
6. Na tibu do tarpatupa Ho, Debata Halalas ni rohangkon
Sian bahal hamatean Tartogihon Ho tompu tondingkinon.
7. Jesus, Ho do na mamorsan Paminsangon Na tama di dosangki
Na so pola habiaran Be tanoman Hehe do au sian i.
8. Nang di tano nang di surgo Ho pargogo Pujionku do tongtong
Jesus Ho hangoluanku Tu lambungMu Alap ma naposoMon.

B.E. No. No.338 HEHE DO MUSE BL.54
1. Hehe do muse pamatangkon sian tanoman on
Suang mangolu bahenon ni Tuhanku Haleluya! Haleluya!
2. Na sinabur doshon eme i Sude na mate i
Na ro ma muse Pangubung di na mate Tuhanta i, Tuhanta i.
3. Paninaran di matanta i Do haheheon i Dung singkop modom
Au dibagasan tano Tarsunggul au, Tarsunggul au,
4. Beha ia ari na denggan Alai na sun denggan Sijaloonta
Di lambung ni Tuhanta Haleluya, Haleluya.
5. Na ditogu Jesus do au on Tu joro na tongtong
Na sun badia Asa mariala Saleleng ni lelengna i.

B.E No. 339 DIINGOT HALAK DAGANG BL.10
1. Diingot halak dagang Do sambulona i
Ai hira marsinondang Disi bintangna i.
2. Malungun do ibana Naeng tu donganna i
Sai naeng ma di rohana Lao mandapothon i.
3. Hape ma sun duhuton Sude tanoman ni
Umbahen sai ngalutan Rohana mida i
4. Alai sai lao rohana Tongtong tu langit i
Mangihut tu bintangna Na marsinondang i
5. Dung i didok rohana Disan do donganki
Di lambung ni Amana Di hasonangan i
6. Ale amang pardagang Naeng tu na sonang ho ?
Sai unang di na alang Tongtong tarlalap ho
7. Haporseai ma Jesus Silehon tua i
Ibana do manobus Ho sian dosami.
8. Sai naeng togihononNa Tu hasonangan i
Saluhut na porsea Naung tinobusNa i.

B.E No. 340 HAMU SALUHUT HALAK BL. 65
1. Tibu ma ro tingkingku Lao bongot tu bagashu Di hasonangan i
Hamuna natorashu Ndang jadi andunganmu Au na manopot Surgo i
2. Jempek tutu ngolungku Dumenggan do jambarhu Na sian Debata
Ndang songgop be sahithu ndang tubu be arsakku Las rohangki sambing nama
3. Ndang leleng dipasombu Tuhanta au mangolu Di partangisan on
Ianggo mate iba Di haposoonniba Tau las ni roha i tongtong
4. Ndang au be hahuaon Ni nasa hajahaton Na di portibi on
Tung ise mangarsahi Sude na sonang muli Tu hasonangan na tongtong ?
5. Las rohamu najolo Marnida pangalaho Ni anakmuna on
Nuaeng tutu ma marsak Hamu dibaen dakdanak Na bongot tu tanoman on.
6. Padirgak ulumuna Tumatap Amamuna Sai unduk ma hamu
Di nasa pambaenanna Na sai tongtong marhata Asa tarapul rohamu.
7. Diboto Debatanta Na tau hangoluanta Sitongosonna i.
Ndang dung adong na masa Na so pinatupana Tongtong denggan do i sude
8. Ai molo sogot jumpang Hamu au di na sonang Marulos na bontar
Marsanggul hangoluan Marmare hamonangan Disi ma i muse patar.
9. Disi ma pujionmu Rap dohot au, anakmu Tuhanta Jesus i
Ipe sai hadengganhon Nuaeng sude pambaenan Ni Debata Amanta i.

B.E No. 341 TIBU MA JUMPANG BL. 132
1. Tibu ma jumpang tingki ni Panopot ni Tuhanta
Di hita manisia i Mandabu paruhumna
Tu nasa na mangolu i Nang tu sude naung mate pe I ma didok hataNa.
2. Tarbege ma soara ni Sarune ni suruan
Dung i na hehe ma sude Na modom di tanoman.
Alai mamintor muba be Saluhut na mangolu pe Dibaen Tuhanta Jesus.
3. Dung i jahaon ma tibu Pustaha panuratan
Di nasa naung hea tutu Binaen ni hajolmaon.
Disi dibege sasude Torang na niulana be Saleleng di ngoluna.
4. Marjea ma disi sude Panjua ni Tuhanta
I ma na nilohotan be Ni arta na lao sega.
Ihuthononna ma disi Sibolis, sipangago i Lao tu banuatoru.
5. Urupi Jesus, au disi Hinorhon ni mudarMu
Asa tarsurat goarhi Di sipangoluonMu.
Na pos do rohangki disi Ai nunga talu musu i Margarar pe utangku.
6. Dibahen i, ondihon au Di ari paruhuman
Sai Ho ma paluahon au Rap dohot angka dongan
Ho ma pujionnami be, Dung sahat hami sasude Di surgo niungkapMu.
7. O Jesus leleng do hape AriM paimaonnami
Mabiar hami sasude Dibaen sitaononnami.
Sai ro ma Ho, ro ma tibu Palua hami situtu Sian sude pangago.

BE No. 342 NGOT MA HO DIJOU SOARA BL. 222
1. Ngot ma ho dijou soara Ni angka sipaboa mara Sai ngot ma ho Jerusalem
Tonga borngin do ombasna Hamu parbaju na marroha
Sai unang ma hamu pedem.Naeng ro pangoli i Pagalak lampu i
Haleluya Marhobas be Hamu sude Tu hasampuran rea i.
2. Dung dibege Sion hata Ni angka na marhal hutana
Mamintor las rohana i Ai jonok alealena Pargogo di hasintonganna
Na binsar do bintangna i.O Jesus na burju Sai ro ma Ho tibu Hosianna
Mangihut be Do on sude Tu halalas ni rohaMi.
3. Sangap huendehon hami Di Ho, O Jesus Tuhannami
Mardongan sipaluon i Ai mutiha na ummuli Do bahal ni hutam na uli
Marende sasude disi Ndang dung binege ni Na sian tano i
Las ni roha Sisongon i Na masa i Di surgo salelengna i.

B.E No.343 JERUSALEM HO HUTA NA TIMBO BL.198
1. Jerusalem ho huta na timbo Anggiat au di ho
Masihol au huhut malungun do Sai naeng manopot ho
Dao sian laut nang tano Dao sian ombun i
Tu ginjang ni sudena Do borhat rohangki.
2. O ari na tumiur situtu Andigan tingkimi?
Asa disi marlasniroha au Pasahat tondingki
Tu tangan ni Debata Tu nampunasa i
Asa tongtong martua Di sambulona i.
3. Satongkin ma asa tondingkinon Mareak langit i
Molo manaek tumading na dison Tiur langkana i
Ai surusuruanNa disuru Jesus i
Mangabing di tanganNa Na tinobusNa i.
4. Jerusalem malungun au di ho Sai ungkap bahalmi
Mansai leleng masihol au di ho Tagan so borhat i
Dope au sian ngolu Na mansai dangol i
Tagan na so hujalo Dope tineanki.
5. Ai ise do sude na ro disan Torop marsangap be ?
I ma antong na monang i hian Na sian tano i
Naung sonang do nasida Huhut marsanggul be
Andorang dao huida Na naeng di au muse.
6. Kristen torop nang panurirang pe Nang angka ompu i
Najolo i do pinorsanna be Hau pinarsilang i
Nuaeng di haluaon Marhasangapon be
Nuaeng di hatiuron Huida sasude
7. Dung i muse dung sahat au tutu Bongot tu huta i
Debatangki ro di Jesusku pe Huida do disi
Disi pe timbul tua Gok las ni rohangki
Marende Haleluya Di na badia i.
8. Tole sude na rap marende do Luhut di surgo i
Hasapi pe ro di sarune i Dipalu do disi
Mamuji Debatanta Nang Tuhan Jesus i
Nang Tondi Parbadia Mambaen sangapNa i.
9. Ho ma tutu dituju rohangki O huta na timbo
Naung mahap do au on di tano i Naeng sahat au tu ho
Na naeng tadingkononku Na olo mago i
Asa pareahonku Parsambuloanki

B.E No. 344 UNGKAP BAHAL NA UMMULI BL. 84
1. Ise do angka nasida Di lambung ni Debata
Na martumpal be huida Jala marsinondang do ?
Na marende do sude Girgir pamujina be.
2. I do angka na malua Angka na tutu burju
Angka dongan na martua Naung porsea situtu
Di Tuhanta Jesus i Na humophop sasude
3. Haporsuhon do ditaon Uju na di tano on
Na marlea nasailaon Gabe hasangapon on
Do turpukna i nuaeng Las rohaNa i dibaen
4. Na marende do nasida Pasangaphon Jesus i
Ala naung tangkas diida Sintong ni hataNa i
Naung pinarbagaNa i Sahat do sudena i.
5. Na so dais be tu nasida Jea ni portibi on
Ndang adong disi tarida Na manusa hita on
Dohot dosa sasude Ndang adong diingot be.
6. Haraparon, hauason Ngali ni arina i
Porhas, ronggur, halojaon Udan las ni ari i.
Uhum ala dosa i Ndang be dais tu na disi.
7. Ai di Debata nasida Na pasabam roha i
Jesus do tongtong diida Di banuaginjang i
Sai martua do sude Ndang na mimbar i muse
8. Ale Jesus Rajanami Na marasi roha i
Sesa nasa dosanami Tiop tangannami be
Dohot hami on sude Sai pabongot ma muse.

B.E No. 345 DI DIA ADIAN ?
1. Di dia adian na sun demak i Sambulo ni tondi dia do i ?
Tung jumpang adian ni tondi dison Di tano ni jolma na mardosa on ?
Nda tung di tano on Di surgo do dapot sambulo inon
Nda tung di tano on Di surgo do dapot sambulo inon
2. Tadingkon ma ruhut ni portibi on Naeng masuk ho sogot tu surgo inon
Ihuthon ma Jesus i partogi do i Ai nasa na olo ditogu tusi
Tongon, tongon i ma tutu Ihuthon ma Jesus partogi burju.
Tongon, tongon i ma tutu Ihuthon ma Jesus partogi burju.
3. Sude na porsea di Jesus hian Dapotan inganan na denggan disan
Tongtong do marende na sahat tusi Dibaen las ni roha na masa disi
Amen, amen Haleluya Sai puji ma Jesus dohot Debata.
Amen, amen Haleluya Sai puji ma Jesus dohot Debata.

B.E No. 346 ADONG DOPE PARADIANAN BL. 217
1. Adong dope paradianan Rohangku golom hata i
Beasa ho tongtong holsoan Binaen ni halojaonMi?
Sai bereng ma partuaonmu I ma Jesus hangoluanmu
Hatop marlojong ho tusi Tibu marujung paraloan
Tibu do dapot hamonangan Pareak ma tu surgo i.
2. Naung dipadiri Debatanta Adian salelengna i
Soada dope jolma sada Nunga rade adian i
Ai mate di hau pinarsilang Do Jesus asa hita sonang
Lao masuk tu adian i “Antong hamu sude na loja Sai ro hamu”
Didok Tuhanta “Bongoti hasonanganki”
3. I pe hamu na marsak roha Manaoni halojaon i
Padirgak be ma ulumuna Ndang jadi be hamu tungki
Ditaon hamu do hasusaan Ro ma hamu tu hasonangan
Didokkon Tuhan Jesus i.Hamu do bangso ni Debata
Sibolis i do hona hata Naung talu do musunta i.
4. Na maradian nama hita Di lambung ni Tuhanta i
Mardame jala sonang hita Tongtong di ingananna i
Itapadoras ma langkanta Mareak bagas ni Tuhanta
Ndang jadi lilianan be Sai beta hita ale dongan
Marlojong ma tu hamonangan Jonok do hasonangan i.

B.E. No. No. 347 SAI MASIPAIDAAN BL.11
1. Sai masipaidaan Do na porsea i Dung sahat be langkana
Tu hasonangan i Tu hasonangan i Tu hasonangan i
2. Antong burju ma hita Mangalo dosa i Sai unang tading hita
Di tongan dalan i, Di tongan dalan i, Di tongan dalan i
3. Sai masipaidaan ma hita on muse di lambung ni Tuhanta
Dung monang hita be, Dung monang hita be, Dung monang hita be

B.E No. 348 LOBI TIMBONA DOPE BL. 42
1. Lobi timbona dope sian bintang
Do manondangi panondang di ho
Sabam disi ma roham jala sonang
Arsak ni roha ndang dais be tu ho
Arsak ni roha ndang dais be tu ho
2. Lobi timbona dope sian bintang
Gabe torang ma sude na buni
Na hinirimmu nuaeng gabe jumpang
Las ni roham ndang mansohot disi
Las ni roham ndang mansohot disi
3. Lobi timbona dope sian bintang
Ndang hahuaon ni musu be ho
Sahat tu ho ma disi hamonangan
Marolopolop tongtong nama ho
Marolopolop tongtong nama ho
4. Lobi timbona dope sian bintang
Surusuruan na manomu ho
Endehononna ma ho ala monang
Sian sitaonon na porsuk ho ro.
Sian sitaonon na porsuk ho ro.

B.E. No. 349 HATIHA NA SO SALPU BE BL. 188
1. Hatiha na so salpu be Sobokkon ronggur do tahe
Saringarmi di ahu Sobokkon podang na tajom
Ditiham Ho do rohangkon Tu dia nama ahu
Tung angka dotdot do au on Di na hupingkir harorom.
2. Ai jea di portibi on Sai na marujung do tongtong
Di ujung ni luhutna Alai na masa sogot i
Ndang dung marujung anggo i Saleleng ni lelengna
Ndang be malua sian i Na lao tu hamagoan i.
3. Mabiar do au mida ho Hatiha na naeng sogot ro
Tu gait ma rohanniba Mamingkir borngin na holom
Nang pe na bernit na tongtong Nda jut ma rohaniba ?
Ai na jumorbut sian i Nda tung adong di tano i.
4. O Debata pintor do Ho Parjahat i didabu Ho
Tu api na so mintop Hatiha pardosaon i
Jempek do anggo uhum i Ndang olo be mansohot
O jolma ingot i tongtong Saleleng ho di ngolumon
5. Sai ngot ma ho, na modom i Di dosa hamagoanmi
Pauba ma rohamu Jonok do paruhuman i
Sai jaloonmu do disi Hombar tu na binaenmu
Aik tung beha ajalmu ro Andorang so ditagam ho.
6. Hatiha na so salpu be Na doshon podang i hape.
Naeng manorusi ahu Hatiha so martingki i
Mansai gondok do rohangki Tu dia nama ahu?
O Jesus sai asi rohaM Pabongot au tu banuaM.

B.E No.350 Songon ende no. 349
1. Hatiha na so salpu be Na las do rohangki tahe
Diapul ho rohangku Hatiha las ni roha i
Na so marlaok na hansit i Di buat ho arsakku
Na songgop tu rohangkinon Saleleng au di tano on.
2. Ai hasangapon tano on Sai na marujung do tongtong
Di ujung ni luhutna Alai na masa sogot i
Ndang dung marujung anggo i Saleleng ni lelengna.
Ndang dung be mago jolma i Na lao tu hasangapon i.
3. Hatiha na so salpu i di na hutaon na porsuk i
Huboto do ujungna Dibahen i tarapul do
Rohangku mamingkiri ho, Ho do hasonanganna
Ai sasude na hansit i Satongkin nama songgop i.
4. Mangolu do di surgo i Saluhut halak Kristen i
Saleleng ni lelengna Marendeende do sude
Dipalu hasapina be Mamuji Debatana
Nang manna na buni disi Dilehon Tuhan Jesus i.
5. Dihalungunhon rohangkon Na loja di portibi on
Ho ngolu hasonangan Andigan sahat au tahe
Tu hasangapon i muse Na di banuaginjang ?
Huhalupahon tano i Mangkasiholi surgo i
6. Hatiha na so salpu i Ho halalas ni rohangki
Pangapul di rohangku Hatiha hasonangan i
Di na hupingkir ariMi Maporus do arsakku
O Jesus paima sahat au Paian siholhi di au

B.E. No.351 MARTUA DONGAN ANGKA NA BL.201
1. Beha ma hita ia dung marujung Paraloanta di portibi on
Dung na malua hita na mangusung Na dokdok i di atas tano on
Lao muli hita tu banuaginjang Dung pinaspashon orbuk tano i
Di na jonok tinatap hasonangan Na pinarsinta ni rohanta i
2. Beha ma hita molo disondangi Panondang na so olo sundut be
Dalanta jala dosa dilongkangi Tuhanta sian hita on sude
So dipabali tihas i be hita So manolsoli be rohanta i
Di na tatopot saluhut donganta Naung sonang di banuaginjang i?
3. Beha ma hita molo taihuthon Panogunogu ni Tuhanta i
Soada be na tau mangambat hita Sian jambarta na di surgo i
Di na tiur pamereng ni matanta Marnida Jesus, Sipangolu i
Na sangap mangkunduli habangsaNa Manggomgom nasa parluhutan i ?
4. Beha ma hita molo begeonta Soara ni Tuhanta Jesus i
Manjouhon hita na pinaluaNa Tu haroanNa na rade disi
Di na taida bogas ni bugangNa Habaoran ni mudarNa uju i
Na paluahon hita sian dosa Nang hamatean salelengnai?
5. Beha ma hita Na so dung diida So dung dibege manang ise pe
I ma turpukta molo masuk hita Tu hasonangan na di surgo i
Nang loja nang hodohan situtu Lao mareakkon bagas ni Tuhanta
Na uli jala sun denggan tutu.

B.E No.352. BEHA MA PANJALONGKU BL. 156
1. Sai hehe ma hamuna Na burju roha i
Pagalak lampumuna Naung songgop bongin i
Naung borhat Sipangoli Ro tu oroan i
Na tong mangkasiholi Pardomuanna i
2. Pauli lampumuna Gok miak baen sude
Managam Tuhanmuna Siban tua i
Parhal di huta Sion Do na manjou hamu
Jonok do hatuaon Jonok do Rajamu
3. Hamuna na marroha Padirgak ulumu
Endehon Heleluya Marsurak ma hamu
Talak do pintu rea Rade haroan i
Sai bongot ma hamuna Rap dohot Raja i.
4. Tibu ma ro Ibana Ipe sai dungo ma
Naung ro lumbalumbana Ipe tangihon ma
Di buha siang ari Lao ma na holom i
Dung i satongkin nari Tiur ma sasude
5. Hamu na holong roha Dihuta Sion i
Sai tomu Rajamuna Marlasniroha be
Ai ari las ni roha Ma jumpang di hamu
Hamu na niorona Parsanggulanna do.
6. Hamu naung benget roha Manaon na porsuk i
Hamu situndal dosa Nang hajahaton i
Mangolu ma hamuna Huhut mangarajai
Rap dohot Tuhanmuna Di sangapmuna be
7. Dison do maremare Hamonanganna i
Dison do sampesampe Hatigoranna i
Dison do hadameon Di naung marungkil i
Dison do hangoluan Di naung binunu i
8. Dison do huta Sion Inganan na denggan
Na gok hamuliaon Na uli na torang
Dison alaman sere Dison haroan i
Dison do tumpal sere Na di oroan i.
9. O Jesus las ni roha Sai ro ma Ho tibu
Sigop ma au palua Ndang sonang au tutu
Di tano paraloan Di hasiangan on
Ho do dihalungunhon Rohangku sai tongtong

B.E No. 353 DI SURGO HASONANGAN I BL. 37
1. Di surgo hasonangan i Inganan na dumenggan i
Tusi naeng laho muli au Asa rap dohot Jesus au.
2. Tutu godang dope adong Marningot au di tano on
Sai tostosanku nama i Lao mandapothon surgo i
3. Na dao dope au sian i Aik tung disungkun rohangki
Tung ise be mandok tu au Na holang sian Jesus au.
4. Na porsuk nang na bernit pe Mansohot ma di surgo i
Disi soada dosa be Mansohot nasa jea pe
5. Ndang parmianan tano on Sai surgo i do na tongtong
Ai rura partangisan on Di ginjang sonang rohangkon.
6. Dibahen i, o tondingki Jalahi na di surgo i
Tibu ma ro mangalap ho Jesusmu Sipangolu ho
7. Denggan do tohapmi disi Di lambung ni Tuhanta i.
Padoras ma tongtong langkam Naeng sonang ho di banuam.

B.E. No. 354 SAI TONG MAIMAIMA DO BL.134
1. Sai tong maimaima do Rohanta i di Jesus
Ibana haluaon do Di angka naung tinobus
Rodo muse Tuhanta i Mardongan hasangapon i
Sai ro ma Ho, o Jesus Sai ro ma Ho, o Jesus
2. Marlasniroha ma disi Sudena naung tinobus
Masihol situtu do i Di Jesus i partobus
Rodo muse Tuhanta i Mardongan hasangapon i
Sai ro ma Ho, o Jesus Sai ro ma Ho, o Jesus
3. Satongkin nari nangkok be Marhitehite ombun
Rap dohot Jesus lao sude Tu surgo i marujung
Sai longang be do sasude Di hasangapon i muse
Di surgo di na sonang Di surgo di na sonang

B.E No. 355 TONGTONG TUTU NA DENGGAN DO BL. 173
1. Malungun do rohangkinon Di ariMi, o Tuhan
Andigan jumpang haroroM Manopot hasudungan
Ni rohaMi ai ala nii Sonang do rohanami HataM huingot hami
2. Sai hupaima hami Ho, Ho do pangulunami
Ai nunga pola mate Ho Pasaehon dosanami
Dibahen i pos rohangki Sai urupanMu hami Di pardalanannami.
3. Sai huhaposi hami Ho Di sitaononnami
Naung saor tu tondinami do TondiM, o Tuhannami
Asi rohaM, ale Tuhan Parade rohanami Di haroroM tu hami.
4. Masihol rohanami be Di hasonangan sogot
Na so mansohot be tahe Tusi ma au pabongot
Na jinouMi tu lambungMi Sai tong do las rohana Tiur huhut langkana
5. Sai ro ma Ho tu hami on Ungkap do rohanami
Naeng ingananmu i tongtong Pasaut pangeleknami
Di haroroM tu hami on Marolopolop hami Ho pasangaponnami.

B.E. No. 356 NA MALUNGUN DO ROHANGKU BL. 179
1. Na malungun do rohangku Tu Ho, o Debatangki
Ho do na hinaposanku Jala haporusanki
Sasude na ro tu Ho Ndang tarurak bahenonMu
Nasa na manoisi Ho I do na pailaonMu.
2. Pabotohon ma dalanmu Dohot bogasMi di au
Asa i ihuthononku Ale Tuhan togu au
Sian dalan na ture Dohot tu hasintonganMu
Ho do hatuaonki TolongMi do paimaonku
3. Ingot ma, ale Tuhanku Angka denggan ni basaM
Naung di au pinasahatMu Dohot asi ni rohaM
Unang ingot dosangki Na hubahen di posongku
Sai asi ma rohaMi Ala lambas ni rohaMu.
4. Ndang marolat denggan basa Ni Jahowa na bonar
Diajarhon tu pardosa Dalan angka na tigor
Na serep marroha i Ditogihon tu na sonang
Na lambok marroha i Di diboan tu na torang
5. Hasintongan, asi roha Do dalanna sasude
Di sude na burju roha Mangoloi patikNa
Tuhan, ala goarMi Sesa ma sude dosangku
Ai mansai godang do i, Lobi asa bilanganku.
6. Ise do mangkabiari Debata Jahowa i ?
Halak i do diajari Lao tu hangoluan i
Sonang do tondina i Dibagasan hasonangan
Jala pinomparna i Do tumean hasiangan.
7. Hasudungan ni Jahowa Do na bonar roha i
Hahomion ni Tuhanna Jadi do botoon ni
Sai tongtong do matangki Mangaranap Tu Tuhanku
Dipalua do pathi Sian jorgong ni musungku
8. Au na punjung jala dangol Tatap ma , o Tuhanki
Ai tu Ho do au masihol Sai palua tondingki
Tu gandana do tongtong Hagogotan ni rohangku
Sai palua ma au on Ale Tuhan Debatangku.
9. Tatap ma pardangolanku Dohot hangalutanki
Sesa ma sude dosangku Sai papir ma tondingki
Lam torop do musungki Lam jorbut do pamuraiNa
Tuhan tatap au disi Asa unang saut tahina.
10. Sai ramoti ma tondingku Tuhan , sai palua au
Ho, haposan ni rohangku Unang ma paruak au
Sai jamot ma tondingki Ala ni halidangonku
Bangso na pinillitMi Naeng tangkas paluaonMu.

B.E No. 357 AI BEASA DI BALIAN ? BL. 177
1. Songon ursa na binuru Mauas di aek tabar i
Songon i do au mangido Naeng solhot tu Tuhanki.
Holan Ho, Debatangki do huhauashon i
Ai andigan idaonku BohiMi ale Tuhanku
2. Iluilu ni matangku Do hupangan sai tongtong
Ala sai didok musungku Tung di dia Debatam ?
Jala maras rohangki Mingot parmasuhonki
Ro di girgir ni endengku Lao tu joro ni Tuhanku.
3. Tungkimi, ale tondingku Tung beasa rusak ho ?
Sai haposi Debatamu Ai paluaonNa do
Ho na marsak i nuaeng Las roham muse dibaen
Asa tong pasangaponmu Goar ni partuaonmu.
4. Sai manungkap do rohangku Di na mangandungi au
Jordan do habuanganku Dohot Hermon na sai dao
Songon aek sampuran i Tinggang tu tondolan ni
Songon i do martinggangan Tu au angka pangunjunan
5. Diparbaga Debatangku Asi ni rohaNa i di au ,
Jadi las rohangku Molo sai huingot i
Borngin nang arian pe Huendehon do sude
Dengganbasa ni Jahowa Na manolong naposona.
6. O partanobatoanku Ndang be ingotonmu au ?
Ai lam ganda do arsakku Diinsahi musu au
Ai holiholingku pe Naung magopu do sude
Ala sai didok musungku Tung di dia Debatamu ?
7. Tungkimi, ale tondingku Tung beasa rusak ho ?
Sai haposi ma Tuhanmu Ndang tadingkononNa ho
Pujionku do muse Tuhan Debata dope
Hatuaon ni bohingku Na tongtong naeng haposanku

B.E No. 358 HAMU SALUHUT HARAJAON BL. 194
1. Hamu saluhut harajaon Marolopolop ma hamu
Endehon ma hamuliaon Ni goar ni Debatamu
Tu Debata ma dok hamuna Na songkal do pambaenanmi
Ai musumi pe saluhutna Marsomba do di jolomi.
2. Tu Ho, o Tuhan do marsomba Muse sandok portibi on
GoarMu do endehononna Pasangaponna Ho tongtong
Ro ma hamu saluhut jolma Marnida pambahenan ni
Jahowa na sai marmulia Di nasa manisia i.
3. Endehon ma Debatanami Saluhut bangso puji be
Na pangoluhon tondinami Huhut na pasonangkon pe
O Tuhan nunga dipapita Ho hami doshon perak i
Lao pabalihon nasa tihas Patauhon tu na denggan i.
4. JoroM do na naeng masuhanku Mambaen di Ho pelean i
Marlasniroha gararonku Sude naung huparbaga i
Ai na marningot do rohangku Di angka bagabagangki
Na puas sian pamanganku Andorang na targogot i.
5. Hamuna na mangkabiari Jahowa, ro ma sasude
Ro ma hamu mananginangi BinaenNa i di au sude
Joujou do au tu Debatangku Di na tarsosak au dope
Lam tu tangkasna di rohangku Na tau mambaen sangapna pe.
6. Girgir hupuji Debatangku Na sai marasiroha i
Ndang ditulakkon tangiangku Dibege do soarangki
Na dangol do au jala pogos huhut tarhilang sai tongtong
Alai Tuhanku do manongos DengganbasaNa di au on.

B.E No. 359 SAI HEHE MA TUHANTA I. BL. 221
1. Sai hehe ma Tuhanta i Mambaen hohom musuNa i. Maporus di joloNa
Sobokkon timus lao sude Malala, songar, pantis pe Niombus ni hosaNa
Ai na mangalo Tuhan i, I ma sude parjahat i Lao do luhutna
Pamereng ni Jahowa i Na manorusi sasude I do paserakhonsa.
2. Alai marlasniroha ma Partigor i di Debata Huhut marhasonangan
Marolopolop ma sude Girgir mamujimuji be Marroha hatorangan
Endehon Debatanta i Sai puji ma goarNa i Pasangap ma Ibana
Patigor ma dalanna i Na sian halongonan i Tuhanta do Ibana
3. Manungkap be ma hita on Mamuji Debata tongtong Dibaen denggan basaNa
Taporsan pe na dokdok i Tuhanta siampehon i Do mangurupi hita
Nda pujionta goar ni Nampuna hatuaon i Jahowa Debatanta ?
Ai ro pe hagogotan i Nang songgop hamatean pe Sai dipalua hita.
4. O Israel, Debatami Do mangalehon gogomi Dibaen asi rohana
O Debata di bangsoMi Pahot na pinatupaMi Tambai hagogoonna
Ai sian i tandaon ni Na manggomgomi bangso i, O Debata sangapMu
Dung i sai ro ma sasude Mamboan tu joroM muse Jahowa, peleanMu.
5. Songkal do Debatanta i Ro sian ingananNa i Na marhabadiaon
Ibana do Debata ni BangsoNa, hinophopNa i Silehon hagogoon
Tutu, Holong rohaNa i Di nasa na porsea i Ditatap do bangsoNa
Antong sai tapasangap ma Na sasadasa Debata Tapuji ma goarNa.

B.E No. 360 DI TANO ON MARDAGANG AU BL. 191
1. Tongtong longang do rohangkon Di hinadenggan ni joroM,
Jahowa Sebaot, Tuhanku. Mansai malungun rohangki
Naeng lao tu alamanna i. Solhot tu habadiaonMu
Ho, Sipangolu tondingki Naeng pujionku do disi.
2. Amporik.leangleang i Marasar do di jabuMi
Marpangondian tu langgatan Au on pe, ale Rajangki
PasabamonMu ma disi Tu Ho do au marhasahatan
Martua halak sasude Na mangingani joroMi
3. Tutu martua halak i Na mangasahon gogoMi
Huhut mardalan di dalanMu Nang pe mamolus jolma i
Di rura partangisan i Parmualanna do basaMu
Mabaor do pasupasuMi Tongtong gogo tu jolma i
4. Lam leleng pardalanan ni Lam ganda do gogoNa i
Ai sahat do sude tu Sion Paeleng, Tuhan, pinggolMi
Tangihon ma tangiangki Sai tongos ma pangurupion
Manogu au tu joloMi Mamujimuji goarMi.
5. Ho lombulombu situtu Di nasa jolma na burju
Sai tatap na miniahanMu . Sadari pe di jabuMi
Dumenggan sian ari i, Saribu di parholanganMu
Lea pe au di tano on Asal maringan di joroM.
6. Panondang, lombulombu pe Do Debata di hita be
Na marhaposan tu Ibana Ai asi ni rohaNa i
Nang pe hamuliaon i Dilehon tu hasudunganna
O Tuhan sai martua do Na marhaposan i tu Ho.

B.E. No.361 NA DENGGAN SITUTU DO BL.157
1. Na denggan situtu do mamuji Debata
Jahowa na tumimbo Na sai tongtong basa
Denggan do paboahon Manogot asiMi
Bodari mangendehon BurjuM nang sintongMi
2. Mardongan sipiltihon Na denggan situtu
Naeng ma tongtong pujion Ni nasa na burju
Ho Tuhan Debatangku Ai las ni rohangki
Do na tongtong binaenMu Di pambahenanMi
3. Ai jadijadianMu Mansai balga do i
Nang angka pingkiranMu mansai bagas do i
Ndang dapot i tandaon Ni baoa na bodo
Ai holan sibotoon Ni na porsea do.
4. Martumbur pe parjahat Di atas tano on
Sobokkon duhutduhut Ndang mian i tongtong
Tompu do disiaphon Ho saluhutna i
Alai Ho do manongtong Ho na tumimbul i.
5. MusuM, o Debatangku Sibaen na jahat i
I ma siaphononMu Marserak ma sude
Alai patimboonMu Ma au naposoMon
Huhut pargogoanMu Mamuji Ho tongtong.
6. Pamereng ni matangku Sombu ma baenonmi
Marnida hadadabu Ni angka alongki
Au naeng agohononNa Hape na sundat do
Tinahi ni rohana O Tuhan dibaen Ho.
7. Martumbur do partigor Tudoshon bagot i
Martunas do nasida Songon hau ares i
Nasida na sinuan Di bagasjoro i
Do na marbungabunga Di alamanna i
8. Sai tubu pinomparna Di na ubanon i
Margogo do nasida Di na martua i
Girgir dibaritahon Na tigor Tuhan i
Na so marhageduhon Pambaenna sasude

B.E No. 362 HAMU SALUHUT HARAJAON BL. 194
1. Endehon ende na imbaru Di Debata Jahowa i
Ai sasadasa dipatubu Saluhut halongangan i
Sai ditaluhon siamunna Do sasude musuna i
Patar dibaen hatigoranna Di jolo ni parbegu i.
2. Diingot Debata Jahowa Do asi ni rohaNa i
Sai dipahot hasintonganNa di bangso na pinillit i
I ma diida hajolmaon Pangisi ni portibi on
Huhut ditanda hatuaon Ni Debatanta na tongtong.
3. Marsuraksurak ma hamuna Na manginganhon tano on
Pangiar ma soaramuna Mamuji Debata tongtong
Marolopolop ma luhutna Mardongan arbap, ogung pe
Lao pasangaphon Debatanta Na manggomgomi sasude.
4. O laut, pagogo parhasakmu Nang tano pe marolop ma
Martopaptopap ma tanganmu O batang aek di Debata
O dolok puji ma Jahowa Na ro manguhum tano i
Na ro manguhum tano i Tarida ma hatigoranna Di nasa manisia i.

B.E No. 363 Songon ende No 362
1. Mauliate dok hamuna Di Debata na basar i
Sai puji ma denggan basaNa Na so marpansohotan i
O Israel girgir endehon Ma asi ni rohaNa i
Na so hea marparujungan Saleleng ni lelengna i.
2. Hamu pinompar ni si Aron Gogo ma hatindangkon i
Dok ma : Saleleng ni lelengna Do asi ni rohaNa i
Hamu pe, na mangkabiari Jahowa Debatanta i
Sai dok Imbaru ganup ari Do asi ni rohaNa i.
3. Ai uju au di hagogotan Joujou do au tu Debata
Tang iangki do ditangihon Dibaen do hosangki arga
Jahowa do tongtong donganku Beasa ma mabiar au ?
Tung aha baenon ni alongku Nang manang ise dompak au ?
4. Tuhanku do na manguluhon Sude na mangurupi au
Dibahen i ma hutaluhon Luhut na mangkosomi au
Dumenggan do marhaporusan Tu Debata na sintong i
Asa tu jolma marhaposan Nang pe tu na rumaja i.
5. Parbegu do mangkaliangi Au on, mambuat hosangki
Hape sude do hutanggoi Marhitehite Tuhanki
Ibana do do hupangasahon I do umbaen malua au
Ibana do na niarahon Umbaen marantu monang au.
6. Sobokkon loba na marsorop Dihaliangi musu au
Hape laos songon api mintop Di bulu duri do i lao
Marhite goar ni Tuhanku Do hutaluhon sasude
Au na tinggang naeng bahenonna Ditungkol Debata dope.
7. Jahowa do hagogoonku Endengku las ni rohangki
Ibana do hatuaonku Na margogoihon tondingki
Marolopolop do luhutna Partigor di jabuna be
SiamunMi do, o Jahowa Pamonang naposoM sude.
8. Timbul do tangan ni Jahowa Sibahen hamonangan i
Na tunduk do na jungkat roha Hot jongjong do partigor i
Ndang mate au, sai na mangolu Do au marhite Tuhanki
Pajojoronku, o Pangolu Ma saluhut pambaenanMi.
9. Tutu, gogo do dipinsangi Jahowa au, alai laos tong
So mate au, ai disondangi Denggan basaNa au tongtong
Sai ungkap bahal hatigoran Di au, ai naeng do au tusi
Lao mangalehon hasangapon Di Sipalua tondingki.
10. Dison do bahal ni Jahowa Bongotan ni partigor i
Lao pasangaphon Debatana Di serep ni rohana i
Mauliate ma rohangku Di Ho na asi roha i
Na mangalusi tangiangku Mambahenn hatuaonki.
11. Ianggo batu binolongkon Ni angka pande bagas i
Jahowa do na pajongjongkon Baen batu na di suhi i
Na pinatupa ni Jahowa Do i na longang situtu
Do roha ni na marnidasa Huhut marsomba be burju.
12. Nuaeng ma ari na dumenggan Binaen ni Debatanta i
Dibahen i ma tapadenggan Nuaeng parendeonta i
Tumpahi hami ale Tuhan Di ari las ni roha on.
Sai pasupasu ma pambaenan Ni tangannami be tongtong
13. Pinasupasu ma Rajanta Na ro marhite goar ni
Jahowa Tuhan Debatanta Tu hita huriaNa i
Jahowa, Sidongani hita Do Debata na sintong i
Antong, tambathon peleanna Tu tanduk ni langgatan i.
14. Ho, Debatangku, pujionku Patimbulonku sai tongtong
Mauliate ma rohangku Di Ho dibaen basaM inon
Hamu sude pe, ale dongan Dok ma mauliate i
Ai ndang he marpansohotan Do denggan ni basaNa i.

B.E No. 364 SAI HURANAPI DOLOK I BL. 81
1. Sai huranapi dolok i Aik sura sian i Ro haluaonki
Ndang i, ai sian Tuhan i Sitompa parluhutan Do ro pangurupion.
2. Ndang tarsulandit patmu da Diloas Tuhanmi Na so dung modom i
Tongtong haposi Debata Ndang olo nok mataNa Sai ho do jinagaNa
3. Ibana parlinggomanMi Do mangondingi ho Ndang loasonna ro
Na mangarsahi rohami Las nang ngali pe ari Tongtong i ditampari.
4. Sai diramoti Debata Tondim nang dagingmi Di na marmara i
Lao ruar manang masuk da Saleleng ni lelengna Tongtong ho jagaonNa

B.E No. 365 HALELUYA! PUJI MA BL. 167
1. Haleluya. Puji ma Di joroNa Debata Puji ma goarNa i
Ro di hajanghajang ni Hagogoon ni Tuhanta
Sai pasangap ma tongtong Debata di tano on Ala ni hatimbulonNa.
2. Palu ma sarune i Lao mamuji Tuhan i Sordam nang tulila pe
I ma pangke sasude Pasangaphon Debatanta
Tali sayak, ogung i, Arbap nang hasapi pe Palu baen hasangaponNa
3. Gok parhinaloan i Baen mamuji Tuhan i Nasa gogoMu tahe
Holan i do na ture Na tama di Debatanta
Nasa na marhosa i Naeng mamuji Tuhan i Mangendehon Heleluya.

B.E No. 366 O ALE JESUS TUHANKI BL. BL. 229
1. O ale Jesus Tuhanki Ho Tuhan ni dakdanak i
Ro paluahon sasude naeng Ho nampuna hami be.
2. Ho sondang sian surgo i, ditopot Ho na holom i
Sai tatap hami on sude, patiur rohanami be.
3. O ale Jesus Tuhanki, di ari hatutubuMi
Na las tongtong do roha ni dakdanak na di tano i
4. O pasupasu ma au on, na metmet na di joloMon
Ias ma didi tondingki naeng sahat au tu surgoMi
5. Suman tu pardisurgo i, burju serep ma rohangki
Jonok ma au di lambungMi, o Jesus, alealengki.

B.E No. 367 NA TAU LAS NI ROHA BL. 2
1. Di banuaginjang Di na tiur i Mian Debatanta Nasun sangap i.
2. Atik pe sai sangap Debatanta Holong do rohana Di na metmet i.
3. Sai ditataptatap Anakkonna Manjagai di dasdas Suruanna i.
4. Tung sai diramothon Do na metmet Unang dililuhon Sipangago i.
5. Bohal nang ulosta Disarihon do Arsak ni rohanta dipalambok do.
6. Dok ma tu dakdanak Adong Debata Ama haholongan Tau haposan da.

B.E No. 368 TUHAN JESUS, TUHAN JESUS BL. 233
1. Tuhan Jesus, Tuhan Jesus ro mulak hape
TinobusNa , TinobusNa ditogu muse
Sai marhillong nasida songon bintang sude
Sai marlinang saksak do ulosna tahe
2. Dipapungu, dipapungu tinobusna i
Angka jolma pinaias ni mudarNa i.
Sai marhillong nasida songon bintang sude
Sai marlinang saksak do ulosNa tahe
3. Na magodang nang na metmet tu Jesus ma ro
Tu lambungNa na di surgo ditogu hamu
Sai marhillong nasida songon bintang sude
Sai marlinang saksak do ulosNa tahe
4. Nang dakdanak, nang dakdanak haolonNa disi
Ai naung sahat, ai naung sahat rohana tusi
Sai marhillong nasida songon bintang sude
Sai marlinang saksak do ulosNa tahe

B.E No. 369 O JESUS PANONDANG BL. 143
1. Na marhahaanggi Hita sasude
Ndang mardia imbar Manang ise pe
Asing be hatanta Nang luatta pe
Sada do Amanta I taingot be.
2. Sada do Amanta Sipangolu i
Sumarihon hita Salelengna i
Sasude ngolunta Nang bohalta i
Sada do Amanta Paradehon i.
3. Sai diranapranap Hita on sude
Jumpa marsikola Nang marmeam pe
Ndang tarula hita Sasude tahe
Molo so Amanta Di lambungta be.

B.E No. 370 IA AEK SANTETEK BL. 1
1. Naeng haholonganku Tuhan Jesus i
Ndang tadingkononku alealengki
2. Ai holong rohana di dakdanak i
Mansai las rohangku dung huboto i
3. Uju maradian Tuhan Jesus i
Ro do na mamboan posoposo i.
4. Dung i disonggahi siseanNa i
Angka na mamboan posoposo i
5. “ Unang sai ambati posoposo i
Loas ma nasida ro tu lambungKi”
6. Ninna Tuhan Jesus alealengki
Ai holong rohaNa di dakdanak i
7. Dung i diampehon ma tanganNa i
Lao mamasumasu posoposo i.
8. Angkup nii diumma Tuhan Jesus i
Jala sai dihaol ma posoposo i.
9. Tangi ale Tuhan ma tangiangkon
Sai tu tutu ma jangkon daging, rohangkon.
10. Holong ni rohaMu naeng luluanki
Ai hinorhon nii do sonang rohangki.
11. Ingkon mian ahu tong di lambungMi
Ai disi au sonang salelengna i.